सिन्धुली । कमलामाई नगरपालिका सिन्धुलीको आयोजनामा शुक्रबार नगरपालिकाको वडा नं. १३ सुनखानीमा एक दिने घुम्ति शिविर सम्पन्न भएको छ । कनपा १३ र १४ लाई लक्षित गरि आयोजना गरिएको शिविरमा २८ जनाले परिचय पत्र प्राप्त गरेका छन ।
नगरपालिकाका अपांगता भएका नागरिकलाई राज्यको सुविधामा पहुँच पु¥याउन र सदरमुकाम आउन नसक्नेहरुलाई घरदैलोमा सेवा दिने उद्देश्यका साथ गरिएको शिविरमा पूर्ण असक्तता अर्थात क वर्गको रातो परिचयपत्र ७ जनाले लिए भने १७ जनाले अति अशक्त अर्थात निलो परिचयपत्र लिए ।
यस्तै शिविरमा ४ जनाले मध्यम अर्थात पहेंलो परिचय पत्र लिएका छन भने १ जनाले सामान्य अपांगताको परिचयपत्र लिएको कमलामाई नगरपालिकाका अधिकृत इन्दिरा थापाले बताईन ।
स्वास्थ्य सुविधा सहितको उक्त शिविरमा अधिकांश कृतिम अपांगता भएका व्यक्तिहरु शिविरमा आएका थिए । कनपा १३ र १४ मा अधिकांश विभिन्न खालका दुर्घटनामा परि शल्यक्रिया गरेका र स्वास्थ्यमा समस्या आएका कारण अपांगता भएका पाईएको शिविरमा संलग्न डा. सुधांशु झाले बताए । उनका अनुसार ७० प्रतिशत अपांगता लालगढ अस्पतालमा उपचार गर्दा शल्यक्रिया विग्रेका र केहि भारतको पटनामा उपचार गरेका विरामीहरु रहेको पाईएको छ ।
साना साना स्वास्थ्य समस्यामा समेत हेलचेक्राई गरेका कारण पनि अपांगता भएका व्यक्तिहरुले समेत परिचय पत्र लिएका छन ।
शिविरमा सम्बोधन गर्दै कमलामाई नगरपालिका सिन्धुलीका उपप्रमुख एवम अपांगता समन्वय समितिका संयोजक मन्जु देवकोटाले स्थानीय सरकारको पहुँचमा नरहेका अपांगता भएका व्यक्तिलाई घर दैलोमै पहुँच पु¥याउनका लागि शिविरको आयोजना गरेको बताईन ।
उनले अपांगताको पहिचानसँगै उनीहरुलाई राज्यको पहुँचमा ल्याउन र समस्या पहिचान गर्न समेत शिविरले सहयोग गरेको बताईन ।
