सिन्धुली । विपी राजमार्ग अन्तर्गत कमलामाई नगरपालिका वडा नं. २ भद्रकाली मन्दिर नजिक आइतबार विहान हायस दुर्घटना भएको छ । झापाबाट काठमान्डौ जाँदै गरेको बा ४ ख ६९६ नम्बरको हायस आफै अनियन्त्रित भई दुर्घटना हुदा एकजनाको घटनास्थलमै मृत्यु भएको छ भने अन्य १० जना घाइते भएको जिल्ला प्रहरी कार्यालय सिन्धुलीले जनाएको छ ।
१८ जना यात्रुहरु रहेको उक्त हायस सडकबाट झण्डै ३०, ३५ मिटर तल झरेको जिल्ला प्रहरी कार्यालय सिन्धुलीका सूचना अधिकारी डिएसपी श्याम बहादुर खत्रीले बताए । उनका अनुसार मृत्यु हुनेमा गाडीका चालक एवम गाडी साहु काठमान्डौ महानगरपालिका वडा नं. ११ गोठाटारका ३८ वर्षिय मोहन महर्जन रहेका छन । उनको घटनास्थलमै मृत्यु भएको हो ।
यस्तै दुर्घटनामा परि २ जना महिलासहित १० जना घाइते भएका छन । दुर्घटनामा घाइते हुनेमा झापाको सनिअर्जुन नपा ३ का कृष्ण अधिकारी, श्री बहादुर बुढाथोकी, पाँचथरको फालेवुङ गाउँपालिका २ का इन्द्र खत्री, ताप्लेजुङ मेदिफेदी ३ का गंगा वि.क, ताप्लेजुङ फेकतालुङ ७ का नाम्जा शेर्पा, कुशुखुला लामा र भुटी लामा, इलामको मंगलबारे नपा ३ का कमल राई, भक्तपुर चागुनारायण नपा ४ का धर्मराज थापा र झापाकी खागमाया खत्री घाइते भएको प्रहरीले जनाएको छ ।
घाइतेहरुको सिन्धुली अस्पतालमा उपचार भईरहेको छ । मृतकको शव सिन्धुली अस्पतालमा पोष्टमार्टमका लागि ल्याईएको छ । घाइते मध्ये दुई जनाको अवस्था गम्भिर रहेको सिन्धुली अस्पतालले जनाएको छ । हायसमा रहेका अन्य ७ जना यात्रु सकुशल रहेको खत्रीले जानकारी दिए ।
