सिन्धुली । साहित्यकार अमला अधिकारीको पहिलो उपन्यास आलयको शनिबार सिन्धुलीमाढीमा चर्चा परिचर्चा गरिएको छ । सरोवर सिन्धुलीको आयोजना तथा सफल स्टेशनरीको संयोजनमा आलयको परिचर्चा एवम गजल वाचन कार्यक्रममा उनको उपन्यासमा चर्चा गरिएको हो ।
कार्यक्रममा लेखक अमलाले उपन्यास आफ्नो जीवन वरिपरी घुमेको बताईन । उनले आफ्नो उपन्यास ‘द्वन्द्व र पुरुषसत्ता’मा महिलाले भोगेका कथालाई उपन्यासमा उतारेको बताईन । उनले भनिन, ‘उपन्यासका केहि बाहेक धेरै सत्य छन, जुन मैले भोगें ।’ जिल्लामा गजलकारको रुपमा परिचित अमलाले लेखेको यो पहिलो आख्यान हो । आख्यानका बारेमा जानकारी गराउँदै उनले भनिन, ‘हामी (महिला) हाम्रा कथा भन्न त डराउँछौं भने समस्या कसले समाधान गर्ने ?’ यहि प्रश्नका बीच आफ्नै कथा लेख्ने हिम्मत गरेकी हुँ , उनले पाठकलाई भनेकी छिन्– ‘यो मेरो दुःखको घर हो, यहाँहरुको मनको घर बनोस ।’
उनले आलय द्वन्द्वको परिवेशलाई मनन गर्न सक्ने उपन्यास बन्नेमा विश्वास व्यक्त गरिन । उनका ४ वटा गजल संग्रह प्रकाशनमा आएका छन । उनका अमला, आगो, आरन र आश्रम गजल संग्रह प्रकाशन भईसकेको छन ।
आलयमा टिप्पणी गर्दै ऐलानी उपन्यासका लेखक विवेक ओझाले द्वन्द्वबाट प्रभावित एकल महिलाको कथामा आधारित र नितान्त गाउँले परिवेशमा लेखिएको उपन्यास भएको बताए । उनले युद्धको असरलाई नजिकबाट नियाल्न आलयले सघाउ पु¥याउने दावी गरे । उनले उपन्यासको भाषा सरल, मिठो,कोमल र भावुक रहेको बताउँदै शहरमा पुगेकालाई गाउँ सम्झाउने उपन्यास बनेको दावी गरे ।
यस्तै कार्यक्रममा आलयमाथि चर्चा गर्दै वा गजल संग्रहका लेखक वाबु त्रिपाठीले पुस्तकले ‘गाउँ विर्सेर शहर पसेकालाई गाउँ सम्झाउने’ कथा र विषयवस्तु बोकेको बताए । उनले गाउँले झर्रा शब्द र गाउँले परिवेशको वर्णन यसको विशेषता रहेको बताए ।
कार्यक्रममा गजलकार वावु त्रिपाठी, अमला अधिकारी, विर्ख वाईवा, कल्याण पहाडी, द्वारिका काफ्ले, सम्झना श्रेष्ठले गजल वाचन गरेका थिए भने सवि बस्नेतले गीत तथा गोपी थापा मगरले कविता वाचन गरेका थिए ।
