सिन्धुली । सिन्धुली जिल्लामा उत्पादित जुनार फललाई संक्रमण मुक्त बनाउने उद्देश्यले जुनार सुपरजोन कार्यान्वयन ईकाई सिन्धुलीले सिन्धुलीमाढीका फलफूल व्यावसायीलाई प्लाष्टिक झोला वितरण गरेको छ । संक्रमित फलको व्यवस्थापन सम्वन्धि जानकारी दिन सदरमुकाम सिन्धुलीमाढीका व्यवसायीहरुसँग अन्र्तक्रिया गरेको सुपरजोनले उनीहरुलाई प्लाष्टिक झोला समेत वितरण गरेको हो ।
कृषकबाट उत्पादित जुनार व्यवसायी मार्फत बजारमा आउने भएकाले संक्रमित फलको व्यवस्थापन यसको रोकथामको एक उपाय भएको भन्दै यसबारे छलफल तथा झोला वितरण गरिएको सुपरजोनका अधिकृत देवराज अधिकारीले बताए । संक्रमित फलबाट निस्कने औसा किरालाई कसरी मार्न सकिन्छ भन्ने विषयमा व्यवसायीहरुलाई जानकारी गराईएको थियो ।
कार्यक्रममा बोल्दै कमलामाई नगरपालिकाकी उपप्रमुख मञ्जु देवकोटाले संकलित जुनारलाई किटाणु रहित बनाई सकेपछि त्यसको व्यवस्थापन कमलामाई नगरपालिकाले गर्ने र जिल्लामा उत्पादित जुनारको फललाई संक्रमण मुक्त बनाउन नगरपालिकाले सहयोग गर्ने प्रतिवद्धता व्यक्त गरिन ।
कृषि उपज बजार संचालक समितिका अध्यक्ष नरेश देवकोटाको अध्यक्षता तथा कमलामाई नगरपालिकाकी उपप्रमुख मञ्जु देवकोटाको प्रमुख आतिथ्यतामा भएको कार्यक्रममा कृषि ज्ञान केन्द्रका प्रमुख भरत विडारी, उद्योग बाणिज्य संघ सिन्धुलीका अध्यक्ष अमरेश चन्द्र वैदार, पत्रकार महासंघ सिन्धुलीका सचिव विदुर पौडेल लगायतले मन्तव्य राखेका थिए ।
