सिन्धुली । सिन्धुलीमा जनप्रतिनिधि निर्वाचित भएपछि आवश्यक सुचना दिन आलटाल हुने गरेको गुनासो आएको छ । शनिवार सिन्धुलीमाढीमा भएको सूचनाको हक सम्बन्धि कानुनी ब्यबस्था र सिन्धुलीमा यसको प्रयोगको अवस्था बिषयक अन्तरक्रिया कार्यक्रमका सहभागिहरुले यस्तो गुनासो गरेका हुन ।
विगतमा कर्मचारीहरुले सहजै दिने सुचनाहरु अहिले जनप्रतिनिधि निर्वाचित भएपछि दिन आलटाल गर्ने, सुचना अधिकारीले नै सुचना थाहा नपाएको भन्दै पालिका प्रमुखलाई देखाउने र पालिका प्रमुखले सुचना अधिकारी देखाउने गरेको सहभागिहरुको आरोप छ ।
सुचनाको हक सम्बन्धि कानुन अनुसार सुचना माग गरे पनि कार्यालयका सुचना अधिकारी तथा पालिका प्रमुखले आवश्यक सुचनालाई बंगाएर अपुरो वा घुमाउरो तरिकाले दिने गरेको बताएका थिए ।
कार्यक्रममा नेपाल पत्रकार महासंघका केन्द्रीय सदस्य द्धारिका काफ्लेले सुचनाको हक सम्बन्धि कानुनी अवस्था, कार्यान्वयन र सूचनाको हकसँग सम्बन्धित रहेर प्राप्त गर्न सकिने प्रक्रियाका बारेमा जानकारी गराएका थिए ।
उनले सुचनाको हक पत्रकारका लागि मात्र लागु हुने भन्ने जनमानसमा गलत बुझाई भएकाले पनि यसको प्रयोगमा कमी भएको बताए । पत्रकारले मात्र नभई नागरिकले सार्वजनिक निकायमा भएका गतिविधि जानकारी लिन र सम्बन्धित पक्षलाई खबरदारी गर्न समेत सूचनाको हकको प्रयोग गर्न सकिने बताए ।
नागरिक समाज बलियो नहुँदा सार्वजनिक निकायमाथि पछिल्लो समयमा खबरदारी कम हुँदै गएको र गलत प्रवृत्तिका व्यक्तिहरुलाई लाभ मिलिरहेको समेत सहभागीको भनाई रहेको थियो ।
स्वास्थ्य सञ्जाल सिन्धुलीका अध्यक्ष वेदराज दाहालको अध्यक्षतामा पारस्पारिक जवाफदेहीता परियोजना अन्र्तगत भएको अन्तरक्रिया कार्यक्रममा हुराडेक सिन्धुलीकी कार्यक्रम संयोजक सुष्पा भुजेलले सहजीकरण गरेकी थिईन् ।
