जिल्ला प्रशासनमा १ घण्टा धर्ना, सिडिओसँग घटनाको छानविनका लागि समिति गठन गर्न माग
सिन्धुली । नेपाल पत्रकार महासंघ सिन्धुलीका अध्यक्ष होमकुमार कार्की (राजन) र पूर्व अध्यक्ष मिनकुमार दाहालमाथि शनिबार राती भएको आक्रमणको विरोधमा नेपाल पत्रकार महासंघ लगाएत जिल्लाका सञ्चारसँग सम्बन्धित संघसंस्थाहरु आन्दोलित भएका छन । पत्रकार महासंघको अगुवाईमा जिल्लामा संघसंस्थाहरु आन्दोलित भएका हुन ।
घटनापछि आइतबार विहानै जिल्ला शाखाका उपाध्यक्ष बिमला पाण्डेको अध्यक्षतामा बसेको आकस्मिक बैठकले दोषीलाई कारवाहिको माग सहित दवावमूलक तरिकाले आन्दोलनमा होमिएको छ । महासंघका प्रदेश नं. ३ का सचिव राजन गाउँले, जिल्ला शाखाका संस्थापक अध्यक्ष शेषराज दाहाल सहितका पूर्व अध्यक्षहरु, महासंघका कार्यसमिति पदाधिकारी सदस्यहरुको बैठकले घटनाको निन्दा गर्दै कारवाहिको माग गरेको छ ।
आकस्मिक वैठकपछि महासंघले विज्ञप्ती मार्फत आधिकारीक धारणा सार्वजनिक गरेको छ । महासंघले सुरक्षा निकायबाटै भएको घटना निन्दनीय रहेको भन्दै दोषीलाई कडा कारवाहिको दायरामा ल्याउन र घाइते पत्रकारद्वयको उपचार, क्षतिपूर्तिको व्यवस्था गर्न माग गरेको छ । महासंघका सचिव विदुर पौडेलद्वरा जारी विज्ञप्तीमा पत्रकारको आक्रमणले सिंगो सञ्चार क्षेत्र, पेशागत क्षेत्र र आम नागरिक समेत असुरक्षित रहेको महसुस गरेकाले सुरक्षाको ज्ञारेन्टी गर्न स्थानीय प्रशासनसँग माग गरिएको छ ।
यसैबीच नेपाल पत्रकार महासंघले १ घण्टा जिल्ला प्रशासनमा धर्ना दिएको छ । महासंघको आयोजनामा घटनाका दोषीलाई कारवाहिको माग गर्दै महासंघले जिल्ला प्रशासन गेटमा धर्ना दिएको हो । धर्ना पछि महासंघले ३ बुँदे माग सहित प्रमुख जिल्ला अधिकारी जनार्दन गौतमलाई ज्ञापन पत्र बुझाएको छ । महासंघका उपाध्यक्ष विमला पाण्डेले ज्ञापन पत्र बुझाएकी हुन ।
ज्ञापनपत्रमा पत्रकारद्वय कार्की र दाहालमाथि आक्रमण गर्ने प्रहरीलाई निलम्बन गरि ज्यान मार्ने उद्योगमा मुद्दा दर्ता गरि कारवाहि गर्न, पत्रकारको सुरक्षाको ज्ञारेन्टी गर्न, घाइतेको उपचार तथा क्षतीपूर्तिको व्यवस्था गर्न र घटनाको वास्तविक छानविन गरि कारण पत्ता लगाउन छानविन समितिको गठनको माग गरिएको छ । प्रमुख जिल्ला अधिकारी गौतमले पत्रकारहरुको सुरक्षामा प्रशासन संवेदनशिल रहेको र दोषीलाई विना कुनै पूर्वाग्रह र बचावट विनै कारवाहि गरिने विश्वास दिलाए । उनले घटनाको छानविनका लागि आफु तयार रहेको प्रतिवद्धता समेत व्यक्त गरेका छन ।
यसैबीच घटनाको प्रेस चौतारी नेपाल सिन्धुलीका कार्यवाहक अध्यक्ष विनय दाहाल, प्रेस सेन्टर सिन्धुलीका अध्यक्ष बुद्धकुमार आछामी, नेपाल प्रेस युनियनका अध्यक्ष यमप्रसाद चौलागाई, नेपाल आदिवासी जनजाति पत्रकार महासंघका अध्यक्ष नविन श्रेष्ठ र क्रियाशील पत्रकार महिलाका अध्यक्ष सुजाता लामाले संयुक्त रुपमा विज्ञप्ति जारी गरी घटनाको छानविन गरी दोषीमाथि कडा कारवाहीको माग गरेका छन ।
के भएको थियो घटना ?
कमलामाई नगरपालिका ६ शिवनगरमा शनिबार राति करिब ९ बजे महासंघका शाखा अध्यक्ष कार्की र पूर्व अध्यक्ष दाहालले खाजा खाइरहेको अवस्थामा सादा पोशाकमा आएका दुई प्रहरीले मोवाइलबाट भिडियो खिचेका थिए । भिडियो नखिच्न कार्कीको अनुरोध नमानेपछि सामान्य भनाभन हुदा जिल्ला प्रहरी कार्यालय सिन्धुलीमा कार्यरत काभ्रे जिल्ला खावा ६ घर भएका प्रहरी हवल्दार सलामसिंह लामा र काभ्रे जिल्ला पनौती ७ घर भएका प्रहरी जवान विकास स्याङतानले टेवलमै आक्रमण गरे । एक्कासी बोतलले हानेर लडाएपछि कार्कीलाई हेलमेट, ढुंगा, इटाले आक्रमण गरिएको थियो भने दाहाललाई लात्तिले हानेकोमा उनी भाग्न सफल भएका थिए ।
दाहालले गुहार मागेर स्थानीय जम्मा हुदा कार्की बेहोस भईसकेका थिए । त्यस्तै दोषी प्रहरीले वाईक लिएर भाग्न खोज्दा दाहालले बालुवा आँखामा हालिदिएपछि बाइक छोडेर प्रहरीद्वय भागेको पीडित दाहालले बताए । भाग्ने क्रममा दुवै प्रहरी घाइते भएका छन । दाहलका अनुसार प्रहरी प्रमुखलाई फोन गरि घटनाबारे जानकारी गराएपछि स्थानीयको सहयोगमा कार्कीलाई जिल्ला अस्पतालमा ल्याईएको थियो । वेहोस अवस्थामा सिन्धुली अस्पताल ल्याईएका कार्कीको टाउकोमा गम्भिर चोट देखिएपछि तत्काल काठमान्डौ रिफर गरिएको थियो ।
घाइते कार्कीको काठमाडौँस्थित अन्नपूर्ण न्यूरो अस्पतालमा उपचारपछि आइतबार दिउँसो डिस्चार्ज गरिएको छ । टाउकोमा चोट भए पनि भित्री चोट नदेखिएकाले ७२ घण्टापछि पुन अस्पतालमा जाँच गराउन आउन अस्पतालले भनेको छ । त्यस्तै घाइते दाहालको सिन्धुलीमै उपचारपछि डिस्चार्ज भइसकेको छ ।
घटना लगत्तै प्रहरीले कुटपीटमा संलग्न प्रहरीलाई पक्राउ गरेको छ । २१ गते राती नै पत्रकारहरुसमक्ष उनीहरुलाई सार्वजनिक समेत गरिएको छ । यस्तै नेपाल पत्रकार महासंघ केन्द्रीय समिति, प्रदेश नं. ३, फ्रिडम फोरम लगाएतका संस्थाहरुले पनि घटनाको निन्दा गर्दै र दोषीलाई अविलम्ब कारवाहिको माग गर्दै विज्ञप्ती जारी गरेका छन ।
