सिन्धुली । कमलामाई नगरपालिका वडा नं. १ को सालबोटे फाँट सहितका आधा दर्जन खेतियोग्य जमिन सहितका गाउँहरुमा मरिण नदीले कटान गरेको छ । मरिण नदीको कटानका कारण २५० घर विस्थापनको अवस्थामा पुगेको भन्दै वडा नं. १ का स्थानीयहरु जिल्ला प्रशासन कार्यालय सिन्धुली र कमलामाई नगरपालिकामा बुधबार डेलिगेशन गएका छन ।
स्थानीयहरुसँगै कमलामाई नगरपालिका वडा नं. १ का वडा अध्यक्ष नरेश गोले डेलिगेशनमा आएका छन । वडा नं. १ को वाईवाटार देखि जखनी कुण्डसम्म मरिणको धारले कटान गर्दा ५२० विघा जमिन कटान भएको वडा अध्यक्ष नरेश गोलेले बताए ।
गोलेले कमलामाई नगरपालिका र जिल्ला प्रशासन कार्यालयमा वडा कार्यालयकै तर्फबाट उक्त क्षेत्रमा भएको कटान र विस्थापनलाई रोक्न आपतकालिन संरक्षणको व्यवस्था गर्न लिखित रुपमा माग गरेका छन ।
यस्तै स्थानीय किरण कार्की जुनेशको नेतृत्वमा बनेको बाढी पीडित संघर्ष समितिले चाँपाबोटे, वाईवाटार, बद्रीपुर, जखनी, नयाँ बस्ती र शंखरेश्वर उमावि जखनी समेत गरि २५० घरधुरी विस्थापित हुने अवस्थामा पुगेको बताए । उनले उक्त क्षेत्रमा मरिणको कटान रोक्न आग्रह गरेका छन ।
वडा अध्यक्ष गोलेले वडाको बजेटले तटबन्धन गर्न नभ्याउने भएकाले कमलामाई नगरपालिका सिन्धुली र जिल्ला प्रशासन कार्यालय सिन्धुलीमा डेलिगेशन आउनु परेको बताए । उनले मरिण खोलाको क्षतिग्रस्त क्षेत्रलाई बचाईदिन आग्रह समेत गरेका छन ।
गोलेका अनुसार कमलामाई नगरपालिकाले जेसिवि पठाउने र केहि थान जाली उपलब्ध गराउने प्रतिवद्धता जनाएको छ । नगरपालिकाले गर्ने सहयोगले मात्र नपुग्ने भएकाले अन्य निकायसँग समेत समन्वय गरिदिन प्रमुख जिल्ला अधिकारी दिनेश सागर भुसाललाई आग्रह गरेका छन ।
सुनकोशी मरिण डाईभर्सनले तटबन्धन गर्ने भने पनि काम अगाडि नबढ्दा झनै समस्या सृजना भएको समेत डेलिगेसन आएका स्थानीयले बताएका छन । स्थानीय साईतबिर माझीले जोखिममा परेकामध्ये सालबोटे, खारखोला अत्यन्तै जोखिममा रहेको बताए । उनीहरुले गत असोज १३ गतेको बाढीले खारखोला जखनी जोड्ने झोलुंगेपुल बगाएको, डाँडी खहरेले क्षती गरेको बताए ।
प्रमुख जिल्ला अधिकारी भुसालले जलश्रोत तथा सिंचाई डिभिजन कार्यालय सिन्धुलीमा तारजाली नभएकाले चुरे उत्थानशिल परियोजना, स्थानीय तह, सुनकोशी मरिण डाईभर्सन लगाएतका निकायसँग समन्वय गरि समस्या समाधानमा पहल गर्ने प्रतिवद्धता जनाएका छन । उनले तुरुन्तै प्राविधिक पठाउने र स्टमेट गरि आवश्यक सहयोगका लागि प्रदेश सरकारसँग पनि अनुरोध गर्ने प्रतिवद्धता जनाएका छन ।
