सिन्धुली । वैदेशिक रोजगारीको शिलशिलामा एक वर्षमा जिल्लामा आठ जनाको मृत्यु भएको छ । सुरक्षित आप्रवासन (सामी) परियोजनाले जिल्लामा चालु आर्थिक वर्षमा शव झिकाउने र सहायता दावीका आठ वटा घटना आएको जनाएको छ ।
सामीले शुक्रबार सिन्धुली जिल्लामा क्रियाशिल पत्रकारहरुसँग सुरक्षित वैदेशिक रोजगारी सम्बन्धि अन्तक्र्रिया कार्यक्रममा उक्त जानकारी दिएको हो । सामी परियोजनाका जिल्ला संयोजक केआर विजयका अनुसार एक वर्षमा जिल्लामा बैदेशिक रोजगारीमा गएर समस्यामा परेका ४९ केशहरु आप्रवासी श्रोत केन्द्रमा आएका छन । जसमध्ये ८ जना मृत्युपछि शव झिकाउने र सहायता दावीका रहेका छन । सामीमा आएका ८ वटै केश समाधान भएका छन ।
यस्तै ठगीका ११ वटा केश आएका छन । जसमध्ये एक वटा केश जिल्ला प्रशासन कार्यालय सिन्धुलीको सहजीकरणमा समाधान भएको छ । यस्तै अन्य ३० वटा केशमा १५ वटा समाधान भएका छन । जसमा फरक काम, फरक तलब परेका, विदेशमा सम्पर्क विहिन भएका, दुर्घटनामा परेर घाईते भएका लगाएत रहेका छन । ती घटनामा सहजीकरण गर्नेदेखि उद्धार गर्नेसम्मका घटनामा सामीले सहजीकरण गरेको विजयले जानकारी दिए ।
सिन्धुलीमाढीमा भएको अन्तक्र्रियामा आप्रवासी श्रोत केन्द्र सिन्धुलीबाट चालु आर्थिक वर्षमा ५ हजार ६ सय १६ जनाले परामर्श सेवा लिएका छन । जसमा महिला १ हजार ४ सय २६ जना रहेका छन भने पुरुष ४ हजार १ सय ८९ जना र अन्य १ जना रहेका छन ।
जिल्ला प्रशासन कार्यालय सिन्धुलीमा राहदानी बनाउन आउने व्यक्तिहरुले उक्त परामर्श लिने गरेका हुन । सामीका जिल्ला संयोजक विजयले परामर्शका लागि आउने मध्ये ७५ प्रतिशत वैदेशिक रोजगारीमा जानेहरु रहेको बताए । ती मध्ये पनि अधिकांश खाडी मूलकमा जाने रहेका छन ।
यस्तै जिल्लामा रिटर्नी स्वयम् सेवकबाट ७ हजार ५ सय २४ जनालाई सूचना प्रवाह गरिएको उनले बताए । सूचना तथा परामर्शका कारण अधिकांशले परिवारलाई कागजपत्र छोडेर जाने, युजर आईडि लिने र सीप सिकेर जानको संख्या वृद्धि भएको उनको दावी छ ।
यस्तै सामीले अभिमुखीकरणका कार्यक्रम समेत गर्दै आएको छ । एक वर्षमा ४८ वटा कार्यक्रममा ८ सय ८१ जनाले वैदेशिक रोजगारी सम्बन्धि सूचना प्राप्त गरेको समेत उनले बताए ।
