सिन्धुली । सवारी दुर्घटनाका कारण कोमामा पुगेका विरामीले उपचारखर्च तथा क्षतिपूर्ति नपाएपछि विरामीका आफन्तले जिल्ला प्रशासन कार्यालय सिन्धुलीको गेट (भित्री गेट) मा लगेर विरामी राखेका छन ।
विरामीका आफन्तले विरामीको उपचारका लागि रकम अभाव भएपछि जिल्ला प्रशासन कार्यालय सिन्धुलीमा पीडक पक्षबाट क्षतीपूर्ति दिलाई दिन माग गर्दै विरामीलाई प्रशासनमा लगेर धर्नामा बसेका छन ।
चौध महिनादेखि सिन्धुली अस्पतालमा कोमामा रहेका तेज बहादुर सिंजाली मगरको परिवारले जिल्ला प्रशासन कार्यालयमा विरामी लगेर राखेका हुन । उनीहरुले उपचारखर्च दिलाईदिन, दोषीलाई कारवाहि गर्न र पीडितलाई न्याय दिन माग गर्दै विरामी सहित जिल्ला प्रशासन कार्यालय सिन्धुलीमा पुगेका हुन ।
उनीहरुले प्रशासनको गेटमै विरामीलाई राखेका छन । आफुहरुले न्याय नपाएसम्म विरामी लान नसक्ने अवस्थामा पुगेको पीडितकी श्रीमति प्रनिषा रमौली मगरले बताईन । उनले आफुहरुले न्याय र उपचारखर्च नपाएको तथा खर्चको अभाव भएको बताईन ।
उपचारमा लाग्ने खर्च गर्न समेत आफुले गर्न सक्ने अवस्था नरहेको र पीडक पक्षले दिने भनि सहमती गरेको उपचार खर्च समेत पाउन नसकेको उनले बताईन । तेज बहादुरले चलाएको ज८प६४५८ नम्बरको मोटरसाईकललाई तिनपाटन गाउँपालिका वडा नं. ९ का शेषराज पहाडीले चलाएको वा.प्र०१०२७च४३७२ नम्बरको योद्धा बोलेरोले २०७९ साल चैत २ गते तीनपाटन गाउँपालिका वडा नं. २ गैह्रिमा ठक्कर दिएर दुर्घटना भएपछि मगर गम्भिर घाईते भएका थिए ।
कमलामाई नगरपालिका वडा नं. ७ रामपुरका सिंजालीलाई हेलिकप्टर मार्फत काठमान्डौको हेम्स अस्पताल लगिएको थियो । हेम्समा उपचार महंगो भएपछि परिवारले टिचिङ अस्पतालमा उपचार गरेका थिए । १४ महिलाअघि आर्थिक अवस्था नाजुक भएपछि विरामीलाई सिन्धुली अस्पतालमा ल्याईएको थियो । उनको उपचार महंगो भएको र परिवारको आर्थिक अवस्था कमजोर भएकाले उपचारमा कठिनाई भएको प्रनिषाले बताईन । तेजबहादुरको उपचारमा हालसम्म ५० लाख बढी उपचारमा खर्च भईसकेको समेत उनले बताईन ।
गाडी चालक समेत रहेका गाडी धनि शेषराज पहाडीले जिल्ला प्रशासन कार्यालयमा विरामीको उपचारका लागि २० लाख दिने सहमति गरेका थिए । उक्त सहमति बमोजिम दिनुपर्ने रकम मध्ये ५ लाख रुपैंया मात्र पीडितले प्राप्त गरेको प्रनिषाले बताईन । बाँकी १५ लाख रुपैंया पाउन नसकेको उनको गुनासो रहेको छ । जिल्ला प्रशासन कार्यालय सिन्धुलीले सहमति अनुसारको रकम दिन नसकेपछि क्षपिपूर्तिको मुद्दा फैसला गर्न सकेको छैन । गाडी धनी तथा चालक समेत रहेका पहाडी फरार रहेका छन ।
सिन्धुली जिल्ला अदालतबाट सवारीबाट अंगभंग मुद्दा फैसला भईसकेको छ । उक्त मुद्दामा अदालतले २०८१ असार १२ गते कसुर ठहर गरेको थियो भने सोहि असार १९ गते सजाय समेत तोकेको छ । सिन्धुली जिल्ला अदालतका न्यायाधिस रमेश शर्मा पौडेलको इजलासले तीन वर्ष जेल सजाय, २० हजार जरिवाना र ८ सय रुपैंया क्षतीपूर्तिको सजाय तोकेको थियो । उक्त फैसला कार्यान्वयनमा समेत आएको छैन ।
पहाडी २ महिना २७ दिन मात्र हिरासतमा बसेका छन । अदालतले तोकेको बाँकी सजाय कटान गर्न बाँकी रहेको सिन्धुली जिल्ला अदालतले गरेको फैसलामा उल्लेख छ । अदालतबाट सवारी अंगभंग मुद्दा फैसला भई सजाय तोकिए पनि मुद्दा चल्दा धरौटीमा छुटेका पहाडी फेरी पक्राउ परेका छैनन् ।
यता जिल्ला प्रशासन कार्यालय सिन्धुलीमा रहेको क्षतिपूर्ति सम्बन्धि मुद्दा चालु अवस्थामा छ । पीडक र पीडित बीच भएको सहमति कार्यान्वयन नभएपछि जिल्ला प्रशासन कार्यालय सिन्धुलीले उक्त मुद्दा फैसला गरेको छैन । सहमति अनुसार तीन किस्तामा पीडित पक्षलाई उपचारखर्च दिने उल्लेख भएको छ । ४ महिनाभित्र अर्थात २०८१ साउन महिनासम्म तीन किस्तामा रकम भुक्तानी गर्नुपर्ने भए पनि हालसम्म उक्त रकम पाउन नसकेको प्रनिशाले बताईन ।
विरामीलाई गेटमा लगेर राखेपछि प्रमुख जिल्ला अधिकारी लिलाप्रसाद शर्माले विरामीलाई अस्पतालमा नै राख्न र जोखिम नमोल्न विरामीका आफन्तलाई आग्रह गरेका छन । शर्माले पीडक पक्षलाई खोजी गर्ने प्रतिवद्धता समेत व्यक्त गरेका छन । उनले भनेका छन, ‘प्रहरीलाई खोजी कार्यका लागि पटक पटक अनुरोध गरेको तर फेला नपरेकाले समस्या भएका हो । हामीले सकेसम्म छिटो समाधान खोज्ने छौं ।’
प्रहरीलाई पक्राउ गर्न पटक पटक पत्राचार गरिएको प्रमुख जिल्ला अधिकारी शर्माले बताए । जिल्ला प्रशासन कार्यालय सिन्धुलीले मंगलबार पनि पक्राउ गर्न जिल्ला प्रहरी कार्यालय सिन्धुलीलाई पत्राचार गरेको छ भने पीडित पक्षसँग प्रहरी प्रमुख सहित छलफल समेत गरेको छ ।
