सिन्धुली । प्रेस चौतारी नेपाल सिन्धुलीले नेपाल पत्रकार महासंघ सिन्धुलीको कार्यालयमा अनिश्चितकालिन तालाबन्दी गरेको छ । नेपाल पत्रकार महासंघ केन्द्रीय कार्य समितिले सार्वजनिक गरेको सदस्यता नामावलीमा असन्तुष्टि जनाउँदै प्रेस चौतारीले तालाबन्दी गरेको हो ।
प्रेस चौतारी सिन्धुलीले नेपाल पत्रकार महासंघ सिन्धुली शाखाका अध्यक्ष कृष्णहरि घिमिरे मार्फत नेपाल पत्रकार महासंघ केन्द्रीय समितिलाई ध्यानाकर्षण पत्र समेत बुझाएको छ ।
नेपाल पत्रकार महासंघको सदस्यता शुद्धीकरण तथा नयाँ सदस्यताका विषयमा सिन्धुली जिल्लाका क्रियाशील पत्रकार सम्बद्ध संघ संगठनका अध्यक्ष एवम् प्रतिनिधि र नेपाल पत्रकार महासंघ सिन्धुली बीच सहमति भई पत्रकार महासंघ सिन्धुलीको बैठकले सर्वसम्मत पास गरेर पठाएको सदस्यता आफुखुशी परिवर्तन गरि महासंघको प्रदेश समितिले संख्या थप गरेको र सोहि अनुरुप केन्द्रले सार्वजनिक गरेको नामावलीप्रति चौतारीले ध्यानाकर्षण गराएको हो ।
जिल्ला शाखाले गरेको सर्वसम्मत नामावली सिफारिसमा मनपरी गर्ने, आफूखुसी संख्या थप्ने, जालझेलपूर्ण तरिकाले सदस्यता कायम गरेको भन्दै चौतारीले ध्यानाकर्षण गराएको प्रेस चौतारी सिन्धुलीका अध्यक्ष वाई पि विनयले बताए ।
विनयले महासंघको सिन्धुली शाखाले सर्वसम्मत पठाएको नामावली अनुसारको सदस्यता कायम नभएसम्म नेपाल पत्रकार महासंघ सिन्धुली शाखा कार्यालयमा अनिश्चितकालिन तालाबन्दी गरिएको बताए ।
महासंघको केन्द्रीय कमिटीले गरेको निर्णय नसच्चाई वलपूर्वक निर्वाचन गराउन खोजिए प्रेस चौतारीले निर्वाचनको कुनै गतिविधि सञ्चालन गर्न नदिने जानकारी समेत ध्यानाकर्षण पत्रमा गराएको छ ।
