सिन्धुली । जेठ २२ गते (आज) दिउँसो १ बजेदेखि कमलामाई नगरपालिकाले जीर्ण स्टल बजारमा डोजर लगाउने भएको छ । नगरपालिकाले जारी गरेको सूचना अनुसार स्टलबजारका ४८ सटर शुक्रबार भत्किंदै छन् । नगरपालिकाले बुधबार अन्तिम सूचना जारप् गर्दै स्टल बजार भत्काउने सूचना जारी गरेसँगै व्यवसायीहरुले सामान सारिरहेका छन् ।
नगरपालिकाले ३५ दिने सूचना जारी गरेपछि उच्च अदालत पाटन गएका व्यवसायीहरुले अदालतले कुनै निचोड दिन नसकेपछि स्टलबजार भत्कने निश्चित भएको थियो । सोहि अनुरुप स्टल बजार नगरपालिकाले भत्काउने छ ।
कमलामाई नगरपालिकाले निर्माण गरेको उक्त भवन २०७२ सालको भुकम्पका कारण जिर्ण बनेको थियो । स्टल बजार रेड जोनमा रहेका भत्काउनुपरेको कमलामाई नगरपालिकाले जनाएको छ । यो स्टल कमलामाई नगरपालिकाले नै निर्माण गरेको हो ।
स्टल बजार भत्कने भएपछि व्यवसायीहरुले उचित व्यवस्थापनका लागि नगरपालिकासँग सहकार्यको पहल गरेका थिए तर नगरपालिकाले उचित विकल्प दिन नसकेको व्यवसायीहरुको गुनासो रहेको छ ।
केहि व्यवसायीहरु सटर खोजेर सरेका छन् भने केहिले आफ्नो गोदाममा सामान थक्काएर स्टल खाली गरिरहेका छन् । नगरपालिकाले तोकिएको समयभित्र स्टल खाली नगरेमा भत्काउने क्रममा हुन सक्ने क्षतिको सम्पूर्ण जिम्मेवारी सम्बन्धित व्यक्ति स्वयंले व्यहोर्नुपर्ने स्पष्ट सूचना जारी गरेपछि व्यवसायीहरु बाध्य भएर रातदिन गरि सामान सारेका हुन् ।
