प्रधानमन्त्री बालेन्द्र शाहले आइतबार संसदमा बोल्दै ‘भारतले नेपालको भूमि मात्र हैन नेपालले पनि धेरै ठाउँमा भारतको भूमि मिचेको छ’ भन्ने अभिव्यक्ति दिएका छन् । यो अभिव्यक्ति सार्वभौम देशको कार्यकारी प्रधामन्त्रीले जननिर्वाचित संस्था संसदमा बोल्नु र लिम्पियाधुरा लिपुलेकको विषयसँग जोडिनु गम्भिर, त्रुटिपूर्ण र गैह्र जिम्मेबार अभिव्यक्ति हो ।
देशको नक्सा, सार्वभौमिकता र सीमासम्बन्धी विषय राष्ट्रिय स्वाभिमान, कूटनीतिक र राष्ट्रिय हितसँग प्रत्यक्ष जोडिएको संवेदनशील मुद्दा हो। प्रधानमन्त्री जस्तो जिम्मेवार पदमा रहेको व्यक्तिले यस्ता विषयमा बोल्दा तथ्य, इतिहास, कूटनीतिक प्रभाव र त्यसले पार्न सक्ने राष्ट्रिय तथा अन्तर्राष्ट्रिय सन्देशबारे गम्भीर रूपमा विचार गर्नुपर्ने हुन्छ।
संसदमा वादविवाद हुनु, संसदमा बोलिएका अभिव्यक्ति रेकर्डबाट हटाउनु जस्ता क्रियाकलाप दैनिक हुने नै गरेका छन् । देश र जनताप्रति उत्तरदायी संसद (व्यवस्थापिका) कार्यपालिकाको समेत चेक एण्ड व्यालेन्स गर्ने निकाय पनि हो । संसदमा बोलिएका विषयहरु निक्कै संवेदनशिल हुन्छन् र अर्थपूर्ण हुन्छन् । सत्ता पक्ष र प्रतिपक्ष सांसदहरुको जवाफ दिने क्रममा प्रधानमन्त्रीले दिएको अभिव्यक्तिले कुटनीटिक सम्बन्ध र सिमा बहसमा समेत असर गर्छ नै । प्रधानमन्त्री शाहको अभिव्यक्तिको असरले दुई शक्तिशाली देशहरु चिन र भारतसँगको कुटनैतिक सम्बन्ध, वहस र छलफलमा नेपालको सिमा मुद्दालाई समेत कमजोर बनाउँछ ।
पहिलो त देशको प्रधानमन्त्रीको पहिलो सम्बोधन निक्कै महत्वका साथ हेरिएको हुँदा पनि हरेक अभिव्यक्ति सबैले गम्भिर रुपमा लिएका छन् । देशको गरिमासँग जोडिएको सन्दर्भमा नेपालले ठूला शक्तिशाली मुलुकको सिमा अतिक्रमण गर्न सक्ने नै हुँदैन । नेपालले तथ्य सहित आफ्नो भूगोल नक्सामा समेटेको विषयमा त भारतले बलमिच्याईं गरिरहेको सन्दर्भमा आफ्नो भूगोल नेपालमा गाभ्न दिने सम्भावना नै रहन्न ।
प्रधानमन्त्रीको अभिव्यक्ति देशको हित विपरित छ । जननिर्वाचित प्रधानमन्त्रीले संसदमा दिएको यो अभिव्यक्ति सच्चाउन र संसदको रेकर्डबाट हटाउन आवश्यक छ । सभामुखले यो तर्फ ध्यान दिनेछन् र प्रधानमन्त्रीको अभिव्यक्ति रेकर्डबाट हटाउने छन् । यो आम नागरिकको समेत सरोकारको सवाल हो । प्रतिपक्षका सांसदहरुको यो विषयमा भएको गम्भिर ध्यानाकर्षणको अवमुल्यन नगरियोस् ।
यो अभिव्यक्ति देशभक्त आम नेपालीको सरोकारको विषय हो । रास्वपाबाट प्रधानमन्त्री बनेका बालेन्द्र शाहको अभिव्यक्तिले राष्ट्रिय स्वतन्त्र पार्टीको समेत गरिमा घटाएको कुरा समेत ख्याल राख्न आवश्यक छ । राष्ट्र र राष्ट्रियताको सवालमा रास्वपा पनि गम्भिर बनोस् ।
