सिन्धुली । राष्ट्रिय नीजि तथा आवासीय विद्यालय एशोसिएसन, नेपालको सिन्धुली च्याप्टर अन्तर्गतको स्पोर्ट मिट कार्यक्रम दुधौली नगर पालिकाको रंगशालामा सम्पन्न भएको छ ।
एनप्याब्सन सिन्धुलीको नियमित वार्षिक कार्यक्रम अन्तर्गत विहिबारदेखि सञ्चालन भएको खेल सम्पन्न भएसँगै पुरस्कार वितरण समेत गरिएको छ ।
एनप्याब्सनका जिल्ला अध्यक्ष सोनाम बज्यूको अध्यक्षता तथा एनप्याब्सनका केन्द्रीय उपाध्यक्ष कृष्णकुमार उप्रेतीको प्रमुख आतिथ्यतामा सम्पन्न कार्यक्रममा विभिन्न विधाका उत्कृष्ट खेलाडीहरूलाई पदक तथा पुरस्कार वितरण गरिएको छ ।
पुरस्कार वितरण कार्यक्रममा बोल्दै उप्रेतीले विद्यार्थीहरू शारिरीक, मानसिक र वौद्धिक तीनै पक्षमा प्रखर हुनुपर्नेमा जोड दिए । उनले खेलकुदले विद्यार्थीको सबै पक्षमा निखारता ल्याई स्वस्थ प्रतिस्पर्धा, अनुशासन र मेहनतमा विश्वास गर्ने बनाउन महत्वपूर्ण भूमिका खेल्ने बताए ।
जिल्लाका फरक फरक क्षेत्रमा कार्यक्रमहरू राखिँदा विद्यार्थीहरूले आफ्नो जिल्लाको भौगोलिक, आर्थिक एवम् सामाजिक अवस्थाको बारेमा बुझ्न र फरक खेल मैदानमा खेल्न पाउँदा खेलप्रतिको अभिरुची बढ्ने एवम् सचेतना अभिवृद्धि हुने हिमालयन इंलिस स्कुलका प्रिन्सिपल मणि काफ्लेले बताए ।
तीन दिनसम्म चलेको स्पोर्ट्स मिटमा भलिबल, म्याराथन, सटपुट, रिले दौड लगायतका विभिन्न खेलहरु भएका थिए । प्रतिस्पर्धामा एनप्याब्सन आवद्ध २४ नीजि विद्यालयका विद्यार्थीहरू सहभागी भएका थिए । समापन तथा पुरस्कार वितरण कार्यक्रममा विभिन्न विद्यालयहरूको सांस्कृतिक नृत्य प्रस्तुति समेत गरिएको थियो ।
