सिन्धुली । इलाका प्रहरी कार्यालय खुर्कोटले खुर्कोटको चेकप्वाइन्टबाट शनिबार राती राजस्व छली गरि ल्याएका भाँडाहरु बरामद गरेको छ । भाँडा लिएर आएको सवारी साधन सहित राजस्व छलीका सामान बरामत गरिएको जिल्ला प्रहरी कार्यालय सिन्धुलीले जनाएको छ ।
विपी राजमार्गमा सञ्चालन हुने सवारी साधन चेक गर्ने क्रममा प्रहरीले राती नौ बजेतिर १३ थरीका भाँडाकुँडा बरामद गरेको हो । भाँडासँगै बागमति प्रदेश ०१–०२७च७२४७ नम्बरको योद्दा पिकअप समेत नियन्त्रणमा लिईएको जिल्ला प्रहरी कार्यालय सिन्धुलीका डिएसपी सुर्यप्रकाश सुवेदीले जानकारी दिएका छन् ।
सामानहरुको दररेट कम राखी शंकास्पद बिल बनाई ल्याएको अवस्थामा प्रहरीले गाडी र भाँडा नियन्त्रणमा लिएको हो । प्रहरीले बागमति प्रदेश ०१–०२७च७२४७ नम्बरको योद्दा पिकअप र सोहि पिकअपमा लोड गरिएको ५ लिटरको सितल गोल्ड कुकर १३६ थान, ३.लिटरको अनुराग गोल्ड कुकर ६८ थान, ३ लिटरको अम्बे कुकर २५ थान, २ लिटरको अम्बे कुकर ३७ थान, ५ लिटरको अम्बे कुकर ५० थान, ५ लिटरको ब्राईट होम कुकर ११ थान, ३ लिटरको ब्राईट होम कुकर २ थान, १.६ लिटरको उलुनको स्टिल टिफिन बक्स ३२ थान, १.८ लिटरको ब्राईटहोमको इलेक्ट्रिक जग १९ थान, २.२ लिटरको ब्राईटहोम राईस कुकर ४ थान, स्टिलको खण्डेथाल ९१ थान, तामा जस्तो देखिने गिलास ३८ थान बरामद गरेको सुवेदीले बताए ।
सवारी साधन, सवारी साधनका चालक कनपा १ का निरोज कोईराला सार्की र बरामद गरिएका भाँडा सहित आइतबार थप अनुसन्धानका लागि राजस्व अनुसन्धान कार्यालय पथलैया पठाईएको सुवेदीले जानकारी दिए ।
