सिन्धुली । सूचनाको हक सम्बन्धि व्यवस्थामा सबै सरकारी तथा सार्वजनिक निकायहरुले त्रैमासिक रुपमा कार्यालयका महत्वपूर्ण सूचना स्वतः प्रकाशन गर्नुपर्ने हुन्छ तर जिल्लाका सरकारी तथा सार्वजनिक निकायहरुले स्वतः प्रकाशन गर्नुपर्ने सूचना समेत प्रकाशन नगर्ने गरेको पाईएको छ ।
सरकारी कार्यालयहरुले बार्षिक प्रतिवेदन, महत्वपूर्ण सूचनाहरु समेत अपडेट गरेको पाईदैन । अझै पनि कार्यालयहरुमा नागरिकले सहजै पाउनुपर्ने सूचनाहरु समेत पाउन सकेको पाईदैन । सूचना अधिकारीहरु पनि कतिपय अवस्थामा कार्यालयकै सूचना दिन सक्ने अवस्थामा रहँदैनन ।
सूचनाको हकको कार्यान्वयन गर्ने गराउने सन्दर्भमा गरिएको अनुगमनमा जिल्लाका सरकारी कार्यालयहरुले गर्नुपर्ने स्वतः प्रकाशनहरु समेत नगरिएको र सूचना प्रणाली प्रभावकारी नभएको सूचनाको हक सम्बन्धि जिल्ला अनुगमन इकाईले ठहर समेत गरेको छ ।
इकाईका अध्यक्ष एवम् प्रमुख जिल्ला अधिकारी दिनेश सागर भुसालको अध्यक्षतामा सिन्धुलीमाढीमा सोमबार सम्पन्न बैठकले जिल्लाका सरकारी निकायहरुमा अनुगमन गर्दा स्वतः प्रकाशन गर्ने सूचनाहरु समेत वेवसाईडमा सार्वजनिक नगरिएको र सूचनाको हक सम्बन्धि व्यवस्थाको कार्यान्वयन प्रभावकारी बन्न नसकेको ठहर गरेको हो ।
जिल्लामा चौथो त्रैमासिक (२०८२ बैशाख देखि असार) सम्मको प्रतिवेदनहरु कार्यालयका वेभसाईडहरुमा स्वतः प्रकाशन नगरिएको पाईएको इकाईले जनाएको छ ।
इकाईले संघिय कार्यालयहरु २० वटामध्ये १५ वटा, प्रादेशिक कार्यालयहरु १४ वटामध्ये ६ वटा तथा ९ वटा स्थानीय तहमध्ये ३ वटाले मात्र स्वतः प्रकाशन गर्नुपर्ने भनि तोकिएका सूचना प्रकाशन गरेको पाईएको जनाएको छ ।
यस्तै १९ वटा कार्यालयहरुले अन्तिम त्रैमासिक प्रकाशन तोकिएको सयमसिमा भित्र प्रकाशन नगरेको पाईएको बैठकले ठहर गर्दै ती कार्यालयहरुलाई यथाशिघ्र प्रकाशन गर्न लेखि पठाउने निर्णय गरेको छ ।
स्वत: प्रकाशन गर्नुपर्ने सूचना समेत प्रकाशन नगर्ने सरकारी निकायहरुमा सिन्धुली जिल्ला अदालत सिन्धुली, सरकारी वकिल कार्यालय सिन्धुली, जिल्ला प्रहरी कार्यालय सिन्धुली, शिक्षा विकास तथा समन्वय इकाई सिन्धुली, कृषि सामग्री कम्पनी लिमिटेड, उद्योग तथा वाणिज्य कार्यालय सिन्धुली, सिन्धुली अस्पताल सिन्धुली, पशु सेवा कार्यालय सिन्धुली, बागवानी विकास केन्द्र सिन्धुली, शहरी विकास तथा भवन कार्यालय सिन्धुली, खानेपानी तथा सरसफाई डिभिजन फिल्ड कार्यालय सिन्धुली, यातायात व्यवस्था कार्यालय खुर्कोट, पूर्वाधार विकास कार्यालय सिन्धुली रहेका छन ।
यस्तै स्थानीय तहहरुमा कमलामाई नगरपालिका, दुधौली नगरपालिका, सुनकोशी गाउँपालिका, मरिण गाउँपालिका, हरिहरपुरगढी गाउँपालिका, तिनपाटन गाउँपालिकाले स्वतः प्रकाशन गर्नुपर्ने सूचनाहरु प्रकाशित गरेका छैनन ।
यस्तै बैठकले सरुवा, बढुवा वा कुनै कारणले सूचना अधिकारी परिवर्तन भएमा जिल्ला प्रशासन कार्यालय सिन्धुली र जिल्ला हुलाक कार्यालय सिन्धुलीमा लेखि पठाउन समेत जिल्लामा रहेका सम्पूर्ण सरकारी कार्यालयहरुलाई लेखी पठाउने निर्णय समेत गरेको छ ।
जिल्ला हुलाक कार्यालय सिन्धुलीका प्रमुख एवम ईकाईका सदस्य सचिव कुमार थापाले जिल्लामा सूचनाको हकको कार्यान्वयन प्रभावकारी हुन नसके पनि केहि सुधार भने भएको जानकारी दिएका छन ।
