सिन्धुली । डलरको प्रलोभन देखाएर रकम ठगी गर्ने तीन जनालाई प्रहरीले नगद सहित पक्राउ गरेको छ । उनीहरुलाई ठगी गरेको अठार लाख नेपाली रुपैंया सहित पक्राउ गरिएको जिल्ला प्रहरी कार्यालय सिन्धुलीले जनाएको छ ।
पक्राउ पर्नेमा बाह्रविशे नगरपालिका ३ सिन्धुपाल्चोकका २४ वर्षिय श्याम तामाङ, २६ वर्षिय तेन्जेन पाईन र २७ वर्षिय नारायण बहादुर पाईन रहेको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए ।
जिल्ला प्रहरी कार्यालय सिन्धुलीले पत्रकार सम्मेलन गरि पक्राउ परेका व्यक्तिहरु र उनीहरुबाट बरामद गरिएका नगद तथा सामग्री सार्वजनिक गरेको छ ।
पक्राउ परेका व्यक्तिबाठ २ वटा मोटरसाईकल, अठार लाख नेपाली रुपैंया, विस रुपैंयाका ६९ वटा नेपाली नोट, अमेरिकी एक डलर २३९ वटा, विभिन्न कम्पनीका पाँच थान मोवाईल र पक्राउ परेका व्यक्तिको पर्सबाट नेपाली रुपैंया ४ हजार १४६ रुपैंया समेत बरामद गरेको प्रहरीले जनाएको छ ।
जिल्ला प्रहरी कार्यालय सिन्धुलीले पक्राउ परेका ३ जनालाई सिन्धुली जिल्ला अदालतबाट ७ दिनको म्याद थप गरि अनुसन्धान सुरु गरेको पत्रकार सम्मेलन मार्फत जानकारी दिएको छ ।
इलाम नगरपालिका १ इलामका ४४ वर्षका राजु गौतमसँग गोलञ्जोर गाउँपालिका ७ लौकुनबाट अठार लाख नेपाली रुपैंया लिई फरार भएको भनि उजुरी परेपछि प्रहरीले उनीहरुको खोजी गरि पक्राउ गरेको थियो । आइतबार बेलुकी करीब साढे पाँच बजेतिर ठगी गरि फरार रहेको उजुरी प्रहरीमा परेको थियो ।
प्रहरीले खोजतलास गर्दा गोलञ्जोर गाउँपालिका ७ हैवारबेशीमा लुकीछिपी बसेको अवस्थामा उनीहरुलाई पक्राउ गरिएको जनाएको छ । इलाका प्रहरी कार्यालय खुर्कोट र अस्थायी प्रहरी पोष्ट हैवारवेशीको प्रहरी टोलीले उनीहरुलाई पक्राउ गरेको थियो । ठगीमा संलग्न व्यक्तिले गौतमसँग डलर भन्दै नगद लिएर २० रुपैंयाका नोट र नेपाली कागज पोको पारेर दिएका थिए ।
