सिन्धुली । उर्जा, जलस्रोत तथा सिंचाई मन्त्री शक्ति बहादुर बस्नेतले सुनकोशी मरिण बहुउद्देश्यीय आयोजना निर्माणमा सरकारले बजेटको अभाव हुन नदिने बताएका छन । शनिबार सुनकोशी मरिण डाईभर्सन बहुउद्देश्यीय आयोजनाको सुरुङ निर्माण क्षेत्रको अवलोकन गर्दै मन्त्री बस्नेतले यस्तो बताएका हुन ।
राष्ट्रिय गौरवको आयोजना भएकाले सरकारले यो आयोजनालाई प्राथमिकतामा राखेको बताउँदै बस्नेतले अबको एक डेढ महिनामा सुरुङ खन्ने काम सकिने बताए । उनले काम तिव्र गतिले काम भएको प्रति उनले काम गर्ने कम्पनी, प्राविधिक र अप्राविधिक कर्मचारीहरुले दिनमा २१ घण्टा समेत काम गरेको पाईएको बताए ।
सुरुङ निर्माण १२ दशमलब ५ किलोमिटर काम सकिएको छ । ८ सय मिटर काम बाँकी रहेकाले एक महिनाको आसपासमा ब्रेक थ्रु हुने विश्वास मन्त्रालयले लिएको समेत उनले बताए । सरकारले जनशक्ति र प्रविधिको कमी हुन नदिने पनि उनले प्रतिवद्धता जनाए ।
यस्तै मन्त्री बस्नेतले आयोजनाको प्राविधिक पक्षका विषयमा प्राविधिक विज्ञहरुसँग समेत छलफल गरेका छन । सो अवसरमा उनले मरिण कमला डाइभर्सन, चियावारी खुर्कोट सुरुङ मार्गका बारेमा समेत छलफल चलिरहेको र नीति निर्माण गर्ने क्रममा यसलाई समेटेर अगाडि बढिने बताए । दुवै आयोजनाको प्राविधिक अध्ययन भईसकेको पनि उनले बताएका छन ।
कार्यक्रममा आयोजनाको प्रगति, अवस्थाका बारेमा आयोजनामा प्रमुख मित्र बरालले जानकारी दिएका छन । मन्त्री बस्नेतले १२.५ किलोमिटर सुरुङको समेत अवलोकन गरेका छन ।
आयोजना प्रमुख मित्र बरालले भौगोलिक समस्या आउन सक्ने सम्भावित क्षेत्र अझै बाँकी रहेको बताए । उनले भौगोलिक रुपमा ठूलो समस्या नआएमा एक महिनाभित्र सुरुङ खन्ने काम सकेर मेसिन बाहिरिने बताए । यस्तै उनले व्यारेज निर्माण, ड्याम निर्माणको काम भईरहेको बताए । ट्रान्सिमिसन लाईन, पावर हाउस निर्माण, सुनकोशी तामाकोशीको प्रोटेक्सनका काम अगाडि बढेको उनले बताए । २०८४ असोजसम्म आयोजनाको सबै काम सक्ने गरि काम अगाडि बढेको समेत बरालले बताए ।
