सिन्धुली, मरिण । नेकपा (एमाले) का महासचिव शंकर पोखरेलले माओवादी केन्द्रका अध्यक्ष पुष्पकमल दाहालले जालझेलको राजनीति मात्र जानेको बताएका छन । उनले २०४५ सालदेखि हालसम्म लगातार जालझेलको नीति अवलम्वन गर्दै पार्टी नेतृत्वमा बसेको बताए ।
प्रचण्डले आफु महासचिव वन्न स्थायी समितिदेखि केन्द्रिय समितिसम्मलाई एक तह घटुवाको अवधारणा ल्याएर आफु मात्र महासचिव वन्न योग्य वा एक मात्र उमेदवार बन्न सक्नेसम्मको जालझेल गरेको स्मरण गर्दै हाल पनि उनी त्यस्तै जालझेलको राजनीतिमा केन्द्रित रहेको दावी गरे ।
नेकपा एमाले सिन्धुलीले मरिण गाउँपालिकामा आयोजना गरेको जनसभालाई सम्बोधन गर्दै महासविच पोखरेलले अबको एक वर्ष गठबन्धन सरकार सहनु परे देश श्रीलंकाको बाटोमा पुग्ने बताए । जनसभालाई सम्बोधन गर्दै सबै खाले आर्थिक सूचकहरू निराशाजनक अवस्थातर्फ गएको बताए ।
यो सरकार आएपछि एक वर्षको अवधिमा मूल्य बृद्धि दोब्बर भएको, सोधान्तर स्थिति ७०÷८० करोड नाफाको अवस्थाबाट ३ खर्ब भन्दा बढी घाटामा पुगेको, विदेसी मुद्राको संचिति १३ महिनाको बस्तु तथा सेवाको आयात धान्न सक्ने अवस्थाबाट ६ महिनाको वस्तु तथा सेवा पनि धान्न नसक्ने अवस्थामा झरेको बताए ।
नाकाबन्दीको डटेर सामना गर्ने, संविधान सभाबाट संविधान जारी गर्न हिम्मत गर्ने, मिचिएको भूमि फिर्ता ल्याउने, ठाडो शिरले बोल्ने प्रधानमन्त्री देशलाई आवश्यक भएकाले पुन केपी शर्मा ओलीलाई देशको भावी प्रधानमन्त्रीको रूपमा अगाडि सारेर एमाले चुनावी मैदानमा होमिएको बताउँदै महासचिव पोखरेलले प्रधानमन्त्री भारतमा गएर होइन जनताका वीचमा गएर प्राप्त गर्न सकिन्छ भन्ने तथ्य स्थापित गर्न आगामी निर्वाचनमा एमालेलाई बहुमत दिनुको विकल्प नभएको बताए ।
काँग्रेसको विरुद्धमा मत मागेर काँग्रेसलाई नै प्रधानमन्त्री बनाउन माओवादीले गद्दारी काम गरेको आरोप लगाए । जनमतको भावना विपरीत रहेर आफ्नो स्वार्थका लागि माओवादी र पूर्व एमालेका केही नेता अघि बढेकाले गठबन्धन नै गरे पनि एमाले एक्लै जित हासिल गर्ने बताए । एमाले जनमतको कदर गर्ने र जनताको पार्टी भएकाले सङ्घ र प्रदेशमा एमालेले जित हासिल गर्ने दाबी गरे । उनले पुस ५ गते बिहान १९ बुँदे आरोप पत्र फिर्ता लिएर नेकपाको भविष्य जोगाउन प्रचण्ड निवास खुमलटार पुगेको स्मरण गर्दै प्रचण्डले नेपाली कम्युनिष्ट आन्दोलनलाई छिया छिया मात्रै बनाउने बताए ।
प्रचण्डमा राजनीतिक स्थिरता नभएकाले उनको बुताबाट कम्युनिष्ट आन्दोलन अगाडि बढ्न नसक्ने र माओवादी केन्द्र र एकीकृत समाजवादीमा रहेका कम्युनिष्ट आन्दोलनलाई माया गर्ने सम्पूर्ण नेता कार्यकर्ताहरूलाई एमालेमा समाहित हुन महासचिव पोखरेलले अपिल गरे ।
पोखरेलले माओवादी, नेपाली काँग्रेस र समाजवादी पाटी परित्याग गर्नेलाई एमालेमा स्वागत गरे । मरिणमा माओवादीका हस्ति मानिएका नेता कार्यकर्ता गरि पाँच सय जना एमालेमा समाहित भएका छन् ।
