सिन्धुली । नेकपा (माओवादी केन्द्र) सिन्धुलीको जिल्ला संयोजक परित्याग गरि नेकपा एमालेमा समाहित भएका रामकुमार पौडेलले अव एमालेलाई बलियो कम्युनिष्ट शक्ति बनाउने उद्घोष गरे । नेकपा एमाले सिन्धुलीले मरिण गाउँपालिकामा आयोजना गरेको जनसभामा एमालेमा प्रवेश गरेका पौडेलले सभालाई सम्बोधन गर्दै यस्तो बताएका हुन ।
बुधबार एमालेमा प्रवेश गरेका उनले माओवादी केन्द्र विचार र सिद्धान्तबाट च्युत हुदै गएको आरोप लगाए । उनले माओवादी केन्द्रका केहि नेतृत्व आफ्ना वरीपरी घुम्ने फेसबुकेहरुले पोष्ट गरेको फोटो हेरेर मख्ख पर्ने प्रवृति र तीनै फेसबुकेको चंगुल भित्र बसेर इमान्दार र निस्वार्थ कार्यकर्तालाई विर्सिएका कारण माओवादी पार्टीको अस्तित्व नै संकटतर्फ उन्मुख भएको बताए ।
माओवादी पार्टीमा आएका अवसर लिन पनि फेसबुकेहरु नै पाउने र जनताको विचमा बसेर काम गर्ने व्यक्तिहरु त्यो अवसरबाट वञ्चित हुने गरेका कारण पनि कार्यकर्ताहरुमा विचलन आएको बताए ।
माओवादीको विघटन मरिणबाट आरम्भ भएको बताउँदै उनले भने, ‘कालो बादलमा रुमलिएका चराहरू आजदेखी सूर्यको उज्यालोमा सगरमाथा चुम्न स्वतन्त्र भएर उड्न थालेका छन् ।’
माओवादीले विचारलाई कुण्ठित गरेर कार्यकर्तालाई पिँजडामा थुनेर राखेको उनले आरोप लगाए । माओवादीले जनपक्षीय काम गर्न सकेन, जनताको पार्टी बन्न सकेन, विचारबाट टाढिने र कार्यकर्ताका नेता नभई आफ्नै निर्णयका नेता माओवादीका नेतृत्वमा हाबी भएपछि माओवादी छाडेको बताए ।
कम्युनिष्ट आन्दोलनमा बिताएका बर्षहरूलाई नै निरन्तरता दिँदै अव जनताको प्यारो पार्टी एमालेमा आफूहरू समाहित भएको बताए । मरिणमा यो एमालेमा समाहित हुनेको संख्या अन्त्य नभई सुरुवात भएको दाबी समेत पौडेलले गरे । एमालेमा समाहित हुने तयारीमा रहेका माओवादीका नेता कार्यकर्ताहरूलाई माओवादीले होटेल होटेलमा लगेर थुनेर राखेको र विचारलाई कसैले पनि थुन्न नसक्ने बताउँदै माओवादीको जङ्गली पाराले आफैलाई हानि गरि रहेको उनले बताए ।
देशभर माओवादीमा रहेका साथीहरूलाई नेकपाको निरन्तरताको रूपमा रहेको एमालेमा जोडिन अपील गर्दै त्यो काम सिन्धुलीबाट सुरु भएको बताए । माओवादीको विघटनले एमाले कम्युनिष्ट आन्दोलनको मूलप्रपाह बन्ने उल्लेख दाबी गरे ।
