सिन्धुली । राज्य पक्षले वेपत्ता पारेको २१ वर्ष र विवाह भएको पचासौं वर्षगाँठमा सिन्धुलीकी सावित्री श्रेष्ठले पुस्तक सार्वजनिक गरेकी छिन । जनयुद्धका बेला बेपत्ता पारिएका चित्रनारायण श्रेष्ठको स्मरणमा उनकी श्रीमति सावित्री श्रेष्ठले उनको सम्झनामा प्रकाशित ‘चित्रनारायण श्रेष्ठ : निष्ठा र निर्भिकताका प्रतीक’ नामक संस्मरण एक कार्यक्रमका बीच सार्वजनिक गरेकी हुन ।
पचासौं वर्षगाँठको दिन पारेर एक कार्यक्रमका बीच पुस्तक सार्वजनिक गरिएको हो । माओवादी जनयुद्धको उत्कर्ष कालमा राज्यद्धारा बेपत्ता पारिएका श्रेष्ठ सिन्धुलीका वामपन्थी नेता, शिक्षक एवंम् सामाजिक अभियन्ता थिए ।
श्रेष्ठ अहिले बेपत्ता सूचिमा छन् । पुस्तक सार्वजनिक कार्यक्रममा श्रेष्ठका सहयात्री तथा नेकपा माओवादी केन्द्रका नेता तथा संघिय सांसद हरिबोल गजुरेलले श्रेष्ठको अवस्था छिट्टै सार्वजनिक गर्न पहल गर्ने बताए । शसस्त्र जनयुद्धको बेलामा लोकतन्त्र स्थापना भए पनि बेपत्ता श्रेष्ठले बोकेको सपना भने अझै पुरा नभएको गजुरेलले बताए ।
पूर्व मन्त्री तथा नेकपा माओवादी केन्द्रका नेता राम कार्कीले श्रेष्ठ शाहसी, इमान र बौद्धिक नेता भएको स्मरण गरे ।
नेकपा एमालेका स्थायी समिति सदस्य मणी थापा, जनता समाजबादी पार्टीका नेता गंगानारायण श्रेष्ठ, वेपत्ता पारिएका नागरीकको छानविन आयोगका सदस्य विश्वप्रकाश भण्डारी, शिक्षाविद गोविन्द प्रसाद गजुरेल, सिन्धुली उद्योग बाणिज्य संघका अध्यक्ष अर्जुन श्रेष्ठ लगायतले श्रेष्ठको राजनीतिक, सामाजिक, शैक्षिक यात्राको स्मरण गरे ।
माओवादीले २०५२ सालमा सशस्त्र युद्धको थालनी गरेपछि स्थायी शिक्षकबाट राजिनामा दिएर युद्धमा होमिएका श्रेष्ठलाई २०५७ साल जेठ १७ गतेका दिन सर्लाही जिल्लाबाट सेनाले गिरफ्तार गरेर वेपत्ता बनाएको थियो । उनको अवस्था अहिलेसम्म सार्वजनिक भएको छैन ।
तत्कालिन माओवादीका नेतृत्वकर्ताहरु पटक पटक सरकारमा पुगे पनि आफ्नो श्रीमानको अवस्थाबारे एकीन नभएकोमा श्रेष्ठकी पत्नी सावित्रीले दुःख व्यक्त गरेकी छिन । बेपत्ता भएको २१ वर्षसम्म श्रीमानको खोजविनका लागि हिडे पनि केहि पत्तो नलागेको उनले बताईन । ‘कत्तै टुप्लुक्क फर्केर आउनु हुन्छ की जस्तो लाग्छ’ सावित्रीले भनिन् ।
उक्त पुस्तकको सम्पादन साहित्यकार तथा पत्रकार विवश वस्तीले गरेका छन भने प्रकाशन पत्नि सावित्री श्रेष्ठले गरेकी छिन । पुस्तकमा ३८ जना लेखकले श्रेष्ठको संस्मरण लेखेका छन । सम्पादक विवश वस्तीले जीवन वृत खण्ड लेखेका छन भने सावित्री श्रेष्ठले काव्याञ्जली खण्ड लेखेकी छिन ।
