सिन्धुली । कमलामाई नगरपालिका नगरपालिका वडा नं. ५ सिन्धुलीको सदरमुकामको वडा हो । यहि वडाका सबै बस्तीमा विकासका काम जति हुनुपर्ने भएको छैन । यहि वडाको एउटा गाउँ छ सानो करकरे । उक्त गाउँमा सदरमुकाममा भए पनि विकासमा ओझेल परेको छ ।
प्रत्येक चुनावमा राजनीतिक दलहरु भोट माग्न जान्छन, आश्वासन विकासका दिन्छन तर विकास दिदैनन । स्थानीयका अनुसार यो गाउँमा ४० घर छन । यहाँका धेरै बासिन्दाले पटक पटक पार्टी फेरेका छन । त्यो पनि विकासको आशमा । तर यहाँ उपलब्धि मूलक विकास हुन सकेको छैन ।
सदरमुकाम सिन्धुलीमाढीबाट सवारी साधनमा जाँदा करीब १० मिनेटमा उक्त ठाउँमा पुग्न सकिन्छ । विपी राजमार्गको नजिकै पर्ने यो गाउँ बत्ति मुनीको अध्याँरो जस्तो छ । विपी राजमार्गबाट ग्वाङखोला तरेर पैदल जाँदा करीब १० मिनेटमा पुगिने यो गाउँमा खानेपानी, सिंचाई, सडक नालाको सुविधा छैन ।
जब चुनाव नजिकिन्छ भोट माग्न यो गाउँमा राजनीतिक दलहरु पुग्छन । यहाँका बासिन्दाले विकासको माग गर्दै एकमुष्ट भोट हाल्छन तर ती आश्वासन चुनावका लागि मात्रै हुन्छन । केहि समय अघि बाग्मति प्रदेशको बजेटमा झोलुंगे पुल बनेपछि वर्षामा खोला तर्न भने यहाँका बासिन्दालाई सजिलो भएको छ । बाग्मति प्रदेश सदस्य विनोद खड्काको पहलमा पुल निर्माण भएको हो ।
तथापी अन्य समस्या ज्यूँकात्यूँ छन । गत स्थानीय तहको निर्वाचनमा नेपाली कांग्रेसलाई भोट हालेका यहाँका बासिन्दा यो पटक कांग्रेसदेखि निकै रिसाएका छन । कांग्रेसले यहाँको एकमुष्ट भोट लिएर वडाअध्यक्ष जित्यो तर वडाअध्यक्ष हालसम्म त्यो गाउँमा के समस्या छ भनेर बुझ्न समेत गएका छैनन । ‘ठूलो पार्टी केहि गर्ला भनेर एक मुष्ट भोट दियौं तर हामीले जिताएका अध्यक्ष पूर्ण बहादुर खड्का गाउँमा के समस्या छ भनेर सोध्न कहिल्लै आएनन’ स्थानीय राजकुमार वाईवाले भने । ‘अब जसले आफ्नो गाउँको विकास गर्छ, उसलाई एकमुष्ट भोट दिने हो, उनले भने ।
नेकपा एमालेका नेताहरुसँग छलफल गर्दै उनले भने ‘हामीलाई नाला चाहिएको छ, सडक चाहिएको छ, खोलामा कल्भर्ट चाहिएको छ, खानेपानी चाहिएको छ, खेतबारीमा पानी छैन सिंचाई चाहिएको छ । खै पाँच वर्षमा कोहि आएनन ? भोट माग्न आएमा भन्छौ, पहिले विकास दिनुस, अनि भोट दिन्छौं ।’
उनका अनुसार विकासको आशमा यहाँका नागरिकले पार्टी फेरेको फेरै छन । पहिले एमाले भएका यहाँका बासिन्दा बीचमा संयुक्त मास्र्कवादीमा थिए । पछिल्लो स्थानीय तहको चुनावमा एकमुष्ट नेपाली कांग्रेस भए तर विकासको आशाा निरासामा बदलियो । उनीहरुका आवश्यकता कसैको नजरमा परेनन ।
अबको चुनावमा यहाँका बासिन्दाले उधारो आश्वासन नलिने भएका छन । जुन अभियानका लागि स्थानीयले युवाहरुलाई अगाडि सारेका छन । एकजुट भएर अगाडी बढ्न पनि उनीहरुले आह्वान गरेका छन । ‘एकजुट भएर अगाडी बढौं’ स्थानीय खेम बहादुर रानाले भने । हामीलाई विकास गर्ने पार्टी चाहिएको हो । एमालेका नेताहरुसँगको छलफलका क्रममा उनले भने ।
एमालेका जिल्ला उपसचिव रश्मिला देवकोटा, एमालेका कमलामाई नगरपालिका अध्यक्ष महेन्द्रदेव श्रेष्ठ सहित जिल्ला तथा नगरका नेताहरुसँग उनीहरुले छलफल गरेका छन । स्थानीयसँगको छलफलमा स्थानीयको विकासको अभियानमा सक्दो सहयोग गर्ने एमालेका नेताहरुले बताएका छन ।
