सिन्धुली । कमलामाई नगरपालिका ३ चपौलीका भूमिहीन दलित, भूमिहीन सुकुम्वासी, अव्यवस्थित बसोबासीलाई सोमबार जग्गा नाप नक्साको निस्सा वितरण गरिएको छ । कमलामाई नगरपालिकाले एक औपचारिक कार्यक्रमको आयोजना गरि जग्गा नापी गरि अभिलेख गरिएका १७ जनालाई निस्सा वितरण गरेको हो ।
यो जिल्लामै पहिलो पटक निस्सा वितरण गरिएको हो । कमलामाई नगरपालिका वडा नं. ३ का अध्यक्ष खड्ग चौलागाईको अध्यक्षतामा भएको निस्सा वितरण कार्यक्रममा राष्ट्रिय भूमि आयोग सिन्धुलीका अध्यक्ष रामकुमार पौडेल, कमलामाई नगरपालिकाकी उपमेयर मञ्जु देवकोटाले भूमिहीन सुकुम्वासी २ जना र अन्य भूमिहीन १५ गरि १७ जनालाई निस्सा वितरण गरेका हुन ।
सुकुम्वासी सन्त बहादुर स्याइतान र वीरबहादुर स्याङतानले निस्सा पाएका छन भने वीरबहादुर स्याङबा, शोबासिं स्याङबा, दलबहादुर स्याङबा, दिपबहादुर लामा, सन्त बहादुर स्याङबा, सन्तमाया स्याङबा, पदम बहादुर स्याङबा, चन्द्रबहादुर स्याङबा, बीरबहादुर स्याङबा, होम बहादुर कार्की, रोशन कुमार दंगाल, पदम बहादुर स्याङबा, विमला कुमारी स्याङबा, लालबहादुर तामाङ, धनबहादुर नेपाली र रिट्ठे दमाईलाई निस्सा वितरण गरिएको छ । ऐलानी जग्गा नाप नक्सा गर्न छुटेको भए फागुन २३ गतेसम्म निवेदन दिन सकिने व्यवस्था समेत गरिएको छ ।
निस्सा वितरण कार्यक्रममा सम्बोधन गर्दै कमलामाई नगरपालिकाकी उपमेयर मञ्जु देवकोटाले कमलामाई नगरपालिकाले कार्यविधि बनाएर कमलामाई नगरपालिकामा ऐलानी, भूमिहीन सुकुम्वासी, अव्यवस्थित बस्तीलाई मापदण्ड तयार गरेर लालपुर्जा वितरण गर्ने तयारीमा रहेको बताईन ।
नगरपालिकाले लालपुर्जा वितरण गर्न हरेक वडामा जग्गा अभिलेख वडा समिति बनाएको र स्थानीय सरकारले दीर्घकालीन रूपमा सम्पत्तिको स्वामित्व हुन नपाएका व्यक्तिहरूलाई लालपुर्जा वितरण गरिने पनि उनले बताईन ।
स्थानीय ऋषि सिग्देल र यज्ञप्रसाद चौलगागाईले निवेदन दर्ता र नाप नक्सा गर्न छुटेका भूमिहीन सुकुम्वासीलाई पनि समेट्न आग्रह गरेका थिए । बर्षौ देखी भोगचलन गर्दै आएको जग्गा बाली नलगाएको भन्दै नापी नभएकाले यसतर्फ नगरपालिकाले ध्यान दिनुपर्ने उनीहरुले माग गरे ।
