सिन्धुली । सिन्धुलीको पिसिआर ल्यावको काउन्ट गर्ने मेसिन विग्रेपछि जिल्लाका कोभिडका विरामीको पिसिआर परिक्षण गर्न धुलिखेल पठाउनुपर्ने बाध्यता आएको छ ।
बाग्मति प्रदेश सरकारको सहयोगमा सिन्धुली अस्पताल मातहतमा रहने गरि कमलामाई नगरपालिका वडा नं. ६ को कोभिड १९ युनिटसँगैको भवनमा स्थापना गरिएको ल्यावको काउन्ट गर्ने मेसिन विग्रेका कारण करिव २० दिन देखि पिसिआर परिक्षण हुन नसकेको सिन्धुली अस्पताल विकास समितिका अध्यक्ष प्रलाद पोखरेलले बताएका छन ।
बाग्मति प्रदेश सरकारको १ करोड २५ लाख बराबरको मेसिन सहयोग र सिन्धुली अस्पतालको १५ लाख व्यवस्थापन खर्चमा सुरु भएको उक्त ल्याव सञ्चालन हुन नसक्दा कोभिड परिक्षणमा समस्या भएको र धुलिखेल अस्पतालमा पठाउन बाध्य भएको पोखरेलले बताए ।
मेसिन बनाउनका लागि बाग्मति प्रदेश सरकार मार्फत मेसिन खरिद गर्ने कम्पनीलाई पठाईएको भए पनि बनि नसकेको उनले बताए । ‘१५ दिन अघि लिखित रुपमा बाग्मति प्रदेशलाई पठाएका छौं, अझै १२, १५ दिन लाग्ने जानकारी आएको छ’, पोखरेलले भने । मेसिन बनेर आएसँगै फेरी ल्याव सञ्चालनमा ल्याइने पनि उनले बताएका छन ।
उनका अनुसार यो ल्यावमा करीब एक सयको हाराहारीमा दैनिक कोभिड १९ परिक्षण गरिदै आएको थियो । जिल्लामा पछिल्लो समय संक्रमण दर केहि घटे पनि नियन्त्रणमा आउन सकेको छैन ।
