सिन्धुली । कमलामाई नगरपालिका ५ मधुटार प्लानिङमा कम्पोष्ट मल बनाउन सुरु गरिएको छ । कमलामाई नगरपालिका र वातावरण विभागको सहयोगमा वडा स्तरीय समन्वय समितिले कम्पोष्टीङ विट स्थापना गरि कम्पोष्ट मल बनाउन सुरु गरेको हो । कमलामाई नगरपालिका वडा नं. ५ को वडास्तरीय टोल विकास संस्था समन्वय समितिले उक्त मल उत्पादन तथा अर्गानिक तरकारी खेति सुरु गरेको हो ।
कमलामाई नगरपालिकाको ५ लाख तथा उपभोक्ताको १ लाख २५ हजार श्रमदानमा उक्त मल उत्पादन सुरु भएको हो । जसको समन्वय चन्द्रमुखी बहुउद्देश्यीय टोल विकास संस्थाले गरेको छ । साढे आठ कठ्ठा जग्गा दश वर्षका लागि भाडामा लिएर मल उत्पादन सुरु गरिएको हो ।
उक्त मल उत्पादन कार्यको कमलामाई नगरपालिकाका प्रमुख खड्ग खत्रीले उद्घाटन गरेका छन । मल उत्पादन विटको उद्घाटन गर्दै कमलामाई नगरपालिकाले उत्पादित मलको बजारीकरण, व्यवस्थापनमा नगरपालिकाले सक्दो सहयोग गर्ने बताएका छन । उनले काम गर्न बजेटका कारण समस्या नहुने बताउँदै जिल्लाकै नमुना काम भएकाले नमुनाका रुपमा काम गर्न समेत सुझाव दिएका छन ।
कार्यक्रममा बोल्दै न्युनतम पारिश्रमिक निर्धारण समितिका सदस्य बिमला पाण्डेले अर्गानिक तरकारी उत्पादन र प्रांगारिक मल उत्पादन जिल्लाको नमुना काम भएको र वातावरण स्वच्छ बनाउन समेत सहयोग पुग्ने विश्वास व्यक्त गरिन । उनले सरकारको वातावरणमैत्री स्थानीय शासनको अभिष्ट पुरा गर्न अभियान उपलब्धि मूलक हुने बताईन । पाण्डेले नगरपालिकालाई प्लाष्टिक मुक्त बनाउन र वातावरणमैत्री बनाउन सबै वडामा यस्ता अभियान आवश्यक रहेको बताईन ।
कार्यक्रममा बोल्दै कमलामाई नगरपालिकाका प्रमुख प्रशासकीय अधिकृत विशकसेन ढकालले समन्वय समितिलाई कार्यविधि निर्माण गरि दर्ता गरिने र अन्य वडामा समेत अभियान चलाईने बताए । कमलामाई नगरपालिकाका वातावरण शाखा प्रमुख सागरकुमार ढकालले नगरपालिकाको नमुना काम भएकाले अध्ययन भ्रमण गर्न लायक हुने गरि काम अगाडि बढाईएको बताए ।
उक्त आयोजनाबाट ६ सय सदस्य परिवार लाभान्वित हुने टोल विकास समन्वय समितिका अध्यक्ष यज्ञ थापाले बताए । उनले समन्वय समितिले वडा भित्रका २७ वटा टोल विकास संस्थालाई समेटेर वित्तीय संस्था निर्माण गर्ने, अर्गानिक तरकारी खेति गर्ने, सबै टोलमा कुहिने र नकुहिने फोहोर छुट्याई व्यवस्थापन गर्ने लगाएतका काम गर्ने लक्ष्य लिएको बताएका छन । योजना बद्ध काम गरेर वातावरण संरक्षण र रोजगारी सृजना गर्ने लक्ष्य वडा स्तरीय टोल विकास समन्वय समितिले लिएको थापाले बताए ।
