सिन्धुली । सिन्धुली कोभिड १९ अस्पतालमा उपचाररत एक सय वर्षकी वृद्धाले बुधबार कोरोना जितेर घर फर्केकी छिन । कमलामाई नगरपालिका वडा नं. ६ की इन्दीरा कुमारी थापाले कोरोना जितेर घर फर्केकी हुन ।
सिन्धुली अस्पतालको व्यवस्थापनमा चलेको उक्त अस्पतालमा एकसाता अघिदेखि उपचाररत आमाले कोरोना जितेपछि स्वास्थ्यकर्मी तथा अस्पताल विकास समितिका अध्यक्ष प्रलाद पोखरेलले उनलाई विदाई गरेका छन ।
वृद्धामा दम, ज्वरो, खोकी लगाएतका लक्षण देखिएपछि उपचारका लागि अस्पताल भर्ना गरिएको थियो । उनमा कोभिड पोजेटिभ देखिएको थियो ।
अस्पताल विकास समितिका अध्यक्ष प्रलाद पोखरेलले आमालाई दिर्घजीवनको कामना गर्दै नमन गरेर विदाई गरे । वृद्धाको स्याहारका लागि खटिएकी छोरी निर्मला बस्नेतलाई समेत अस्पतालले धन्यवाद सहित विदा गरेको हो ।
एकसय वर्षकी आमाको विदाई पछि अध्यक्ष पोखरेलले आमाको आत्मवल र छोरीको स्याहारप्रति नतमस्तक बनेको बताएका छन ।
उनीसँगै जिल्लामा बुधबार २४ जनाले कोभिड जितेका छन ।
वृद्धा सहित कोभिड अस्पतालबाट ५ जना र अन्य होम आईसोलेसनमा बसेका व्यक्तिहरु रहेको स्वास्थ्य कार्यालय सिन्धुलीले जनाएको छ । हालसम्म जिल्लामा २ सय ८८ जनाले कोभिड जितेका छन । जिल्लामा बुधबार ४५ जनामा कोभिड १९ पोजेटिभ पुष्टि भएको छ ।
