सिन्धुली । सिन्धुलीमा पहिलो प्रकाशन गृह सुरु भएको छ । जनस्मृति प्रकाशन गृह नेपालको नाममा जिल्लामा पहिलो पटक प्रकाशन गृह दर्ता गरि सञ्चालनमा ल्याईएको हो । जसको कार्यालयको औपचारिक उद्घाटन कमलामाई नगरपालिका वडा नं. ६ लक्ष्मणचोकमा गरिएको छ ।
कमलामाई नगरपालिकाका मेयर खड्ग खत्रीले कार्यालयको उद्घाटन गरेका हुन । जनसेवा पुस्तकालयका अध्यक्ष एवम नेपाल पत्रकार महासंघ सिन्धुलीका संस्थापक अध्यक्ष शेषराज दाहालको अध्यक्षतामा भएको कार्यक्रममा बोल्दै मेयर खत्रीले प्रकाशन गृह सञ्चालनमा भरपुर सहयोग गर्ने बताए । उनले प्रकाशन गृह सञ्चालनले पुस्तक प्रकाशनका लागि प्रकाशक खोज्दै बाहिर जानुपर्ने अवस्थाको अन्त्य भएको बताए ।
कार्यक्रममा बोल्दै न्युनतम पारिश्रमिक निर्धारण समितिका सदस्य बिमला पाण्डेले प्रकाशन गृह सफल बनाउनका लागि व्यवस्थापन पक्षलाई बलियो बनाउनुपर्ने र व्यवस्थापनमा खटिने श्रमजीविलाई नेपाल सरकारले तोकेको उचित पारिश्रमिक र सेवा सुविधाको व्यवस्था गर्नुपर्नेमा जोड दिइन । पाण्डेले जिल्लाको सञ्चार र प्रकाशनको क्षेत्रमा प्रकाशन गृह स्थापनाले एक इटा थपेको बताइन ।
प्रकाशन गृहका सञ्चालक सारदा पहाडीले प्रकाशन गृहले जिल्लाका सहकारी, संघसंस्था, साहित्य लगाएतका क्षेत्रका सबै खाले पुस्तक प्रकाशन गरिने र विभिन्न प्रकाशनका पुस्तक सुलभ मुल्यमा उपलब्ध गराउने गरि जनस्मृति प्रकाशन सुरु गरिएको बताए ।
