सिन्धुली । सिन्धुलीकी साहित्यकार धनमाया राईको पहिलो कृति सुस्केरामा सानी गजल सञ्चयन शनिबार एक औपचारिक कार्यक्रमका बीच सार्वजनिक गरिएको छ । उमानाथ शास्त्री सिन्धुलीय साहित्यीक प्रतिस्ठानको आयोजनामा सिन्धुलीमाढीमा उक्त गजल सञ्चयन सार्वजनिक गरिएको हो ।
कवि, गजलकार, गीतकार, मुक्तककार समेत रहेकी राई पेशाले शिक्षक हुन । उनले एकल रुपमा प्रकाशन गरेको यो पहिलो कृति हो । ८५ वटा गजलको संग्रह रहेको यो पुस्तक कमलामाई नगरपालिका सिन्धुलीका प्रमुख खड्ग खत्रीले विमोचन गरेका छन ।
अधिवक्ता जंगबहादुर राईको प्रकाशन रहेको यो पुस्तक जंगबहादुर राई र धनमाया राईको वैवाहिक वर्षगाँठको अवसरमा लोकार्पण गरिएको हो ।
लोकार्पण कार्यक्रममा बोल्दै कमलामाई नगरपालिका सिन्धुलीका प्रमुख खड्ग खत्रीले मान्छेको चेतनशिल चोलालाई सहि रुपमा प्रयोग गर्न सक्नुपर्नेमा जोड दिए । मानिसका चेतनालाई जति सहि रुपमा प्रयोग गर्न सकिन्छ सोहि अनुसार सफलता मिल्ने पनि उनले बताए ।
उनले साहित्य, कला र गला अंश नलाग्ने, हरण नहुने पनि बताए । खत्रीले नगरपालिकाको तर्फबाट राईका ५० वटा पुस्तक खरिद गरिदिने बचन समेत दिएका छन ।
कार्यक्रममा समिक्षक तथा शिक्षाविद गोविन्द गजुरेलले पुस्तकमा रहेका गजल सरल, बोधगम्य र सलल बगेका रहेको र स्थानीय परिवेशमा लेखिएको बताए । सृंगारिक गजलकार प्रकट पंगेनी शिवले राईका गजलमा माटो, ठाउँ र भावना बोलेको बताए ।
प्रकाशित गजलको कभर डिजाई सिन्धुपाल्चोकका अमित घिमिरेले गरेका हुन । पुस्तकको प्रकाशन लालीगुराँस अफसेट प्रेस सिन्धुलीले गरेको छ भने आवरण तथा कम्प्युटर सेटिङ सन्तोष सिंजालीले गरेका हुन ।
राईका यसअघि हैसियत ५ संयुक्त गजल संग्रह (२०७६), नारी हस्ताक्षर संयुक्त मुक्त संग्रह (२०७६), प्रज्ञा नारी संयुक्त मुक्तक संग्रह (२०७७) र केहि फुटकर रचनाहरु प्रकाशित भएका छन ।
