सिन्धुली । स्वास्थ्य कार्यालय सिन्धुलीले जिल्लाका ५५ स्थानबाट दोस्रो चरणको कोभिड १९ विरुद्धको खोप एकै पटक सुरु गर्ने भएको छ । फागुन २३ गतेदेखि जिल्लाका ७ स्थानीय तह, २४ गतेदेखि अन्य २ स्थानीय तहबाट उक्त खोप दिन सुरु गरिने भएको हो ।
कमलामाई नगरपालिका, दुधौली नगरपालिका, तिनपाटन, घ्याङ्लेख, गोलञ्जोर, मरिण, हरिहरपुरगढी गाउँपालिकामा २३ गतेदेखि खोप लगाईने भएको छ भने सुनकोशी गाउँपालिका र फिक्कल गाउँपालिकामा २४ गतेदेखि कोरोना खोप लगाईने भएको छ । दुई वटा स्थानीय तहमा नियमित खोपका कारण खोप अभियान एकदिन ढिलो भएको हो ।
खोप सम्बन्धि जिल्ला समन्वय समितिको शुक्रबार बसेको बैठकले उक्त निर्णय गरेको हो । खोप लगाउनका लागि आवश्यक जनशक्ति, उनीहरुको क्षमता विकास र खोपबाट आउन सक्ने समस्या समाधानका लागि गरिने सबै तयारी पुरा भएको स्वास्थ्य कार्यालय सिन्धुलीका प्रमुख जितेन्द्र कुमार शाहले बताए ।
उनका अनुसार ५५ स्थानका लागि ११० जना स्वास्थ्यकर्मी खोपका लागि तयार गरिएको छ । उनीहरुलाई आवश्यक तालिम दिई सकिएको छ । खोपबाट आउन सक्ने असरलाई मध्यनजर गरि जिल्लाका नौ वटै स्थानीय तहमा मेडिकल अफिसर, एक वटा एम्बुलेन्स र अक्सिजन सहितको स्वास्थ्य सेवाको व्यवस्था गरिएको छ ।
दोस्रो चरणमा लगाउन थालिएको खोपमा सरकारको मापदण्डमा ६५ वर्ष माथिका जेष्ठ नागरिकहरु, पहिलो चरणमा खोप लगाउन छुटेका व्यक्तिहरुलाई प्राथमिकतामा राखिएको छ । जिल्लामा ६५ वर्ष माथिका १९ हजार व्यक्तिहरु खोप लगाउने सूचिमा रहेका छन । स्वास्थ्य कार्यालय सिन्धुलीले जनाए अनुसार जिल्लामा १ हजार २ सय ६६ भाइल खोप मौजुदा रहेको छ । जसबाट खोप १२ हजार ६ सय ६० जनाले खोप लगाउन पाउने अवस्था रहन्छ ।
स्वास्थ्य कार्यालयका अनुसार खोपको सुरुवातमा ६५ वर्ष माथिकालाई प्राथमिकता दिईने छ । खोप पुगेसम्म लगाउने र अन्यलाई थप खोप आयपछि लगाउने गरि खोप तालिका र प्राथमिकता निर्धारण गरिएको शाहले बताए ।
यसअघि २ पटक गरि खोप लगाईएको पहिलो चरणको खोपमा जिल्लामा २ हजार १ सय ६९ जनाले खोप लगाएका छन । उनीहरुमा सामान्य खालका समस्या केहि व्यक्तिमा आएको भन्दा बाहेक जटिल समस्या नआएको शाहले बताए । ती व्यक्तिलाई बैशाख ८ र जेठ ८ गतेदेखि दोस्रो पटक खोप लगाईने भएको छ ।
