सिन्धुली । कमलामाई नगरपालिका सिन्धुलीले १११ औं अन्तराष्ट्रिय महिला दिवसका अवसरमा नगरपालिकाका १४ जना एकल, अतिविपन्न महिलालाई उद्यममा प्रोत्साहन गर्ने भएको छ । अन्तराष्ट्रिय महिला दिवस अर्थात ८ मार्चमा नगरपालिकाले फागुन २४ गते नगरपालिकाका १४ वटै वडामा पुग्ने गरि कार्यक्रम गर्ने र वडास्तरकै कार्यक्रममा प्रतिवडा १ जना एकल, अतिविपन्न महिलाई उद्यमशिलता विकासका लागि प्रोत्साहन स्वरुप २०÷२० हजार नगद दिने निर्णय गरेको हो ।
विहिबार महिला दिवस मनाउने सम्वन्धमा विभिन्न संघसंस्था तथा सरोकारवालासँग छलफल गरि उक्त निर्णय गरेको हो । कमलामाई नगरपालिकाका उपप्रमुख मञ्जु देवकोटाको अध्यक्षतामा भएको छलफलमा नगरपालिकाका १४ वटै वडामा कार्यक्रम गर्ने तय गरिएको छ । कमलामाई नगरपालिकाको आयोजनामा ८ मार्चको पूर्वसन्ध्यामा २३ फागुनमा दीप प्रज्वलन गरिने भएको छ । लोकतान्त्रिक चोकमा दीप प्रज्वलन गरि महिला दिवसको स्वागत गरिने भएको हो ।
नगरपालिकाका १४ वडाका १४ जना एकल महिलालाई उद्यमी बनाउने र आयमा जोड्ने उद्देश्यका साथ उक्त कार्यक्रम तय गरिएको कमलामाई नगरपालिकाका उपमेयर मञ्जु देवकोटाले बताईन । उद्यमशिलता विकास गरि आयआर्जनमा जोड्न उक्त रकम दिइएको उनले बताईन ।
उनका अनुसार ८ मार्चका अवसरमा नगरपालिकाको २ र १३ नं. वडाका २ जना वृद्ध आमालाई उचित स्याहारसुसार गर्ने २ जना व्यक्तिलाई समेत सम्मान गर्ने निर्णय भएको छ । जेष्ठ नागरिकलाई बुढेसकालमा स्याहार नगरि दुःख दिईएको अवस्थामा पालनपोषण, स्याहार गर्नेलाई सम्मान गर्दा जेष्ठ नागरिकलाई सम्मान गर्नुपर्ने सन्देश जाने भएकाले उनीहरुलाई सम्मान गर्न लागिएको हो ।
सम्मानित हुनेको नाम भने छनौटकै अवस्थामा रहेकाले सार्वजनिक नगरिएको नगरपालिकाले जनाएको छ । बैठकलाई सम्बोधन गर्दै नगरपालिकाका उपमेयर देवकोटाले महिला र बालबालिकाको संरक्षणका लागि कमलामाई नगरपालिकाले उल्लेख्य काम गर्न थालेको बताएकी छिन ।
