सिन्धुली । जिल्ला प्रहरी कार्यालय सिन्धुलीमा नयाँ नेतृत्वमा आएका एसपी आभुषण तिमल्सिनाले आफु आएदेखिका अपराधमा संलग्न भई पक्राउ नपरेका अभियुक्त खोजी गर्ने र कारवाहिको दायरामा ल्याउने कामलाई तिव्रता दिएको बताएका छन । उनले सोमबार पत्रकार सम्मेलनको आयोजना गरि उक्त कुरा बताएका हुन ।
माघ २ गते सिन्धुली प्रहरी प्रमुखको जिम्मेवारी सम्हालेका एपी तिम्सिनाले जघन्य अपराधका अभियुक्त, पुराना पेन्डिङमा रहेका मुद्दाको कार्यान्वयन, फस्र्यौट, सूचना संकलन लगाएतका काममा प्रहरीले सक्रियता बढाएको बताए ।
जिल्लामा अपराधमा संलग्न केहि घटनाका अभियुक्तहरुलाई सार्वजनिक गर्न आयोजना गरिएको पत्रकार सम्मेलनमा उनले विशेष गरि लागु औषध, हातहतियार, कर्तव्य ज्यान, गाँजा, यौनजन्य अपराधहरु, मोटरसाईकल चोरी, चोरी लगाएतका मुद्दामा कारवाहि प्रक्रिया अगाडि बढाईएको बताए ।
तिम्सिनाका अनुसार यो अवधिमा लागु औषधका १२ वटा घटनाका २३ अभियुक्त पक्राउ गरिएको छ । यस्तै हातहतियार सम्बन्धि ३ वटा मुद्दाका ५ जना, कर्तव्य ज्यानका २ घटनाका ३ अभियुक्त, बलत्कारका ३ जना, हातहतियारका १, चोरी गर्ने ३ मुद्दाका ५ जना पक्राउ गरिएको बताए ।
एसपी तिम्सिनाले यो अवधिमा मरिण क्षेत्रबाट ८५ की गाँजा सहित चारजना पक्राउ परेको समेत बताए । यो अवधिमा २ वर्षदेखि पुराना घटनाका अभियुक्तहरु पक्राउ परेको प्रहरीले जनाएको छ ।
विभिन्न मुद्दाका आरोपित सार्वजनिक
पत्रकार सम्मेलनमा पछिल्ला दिनमा पक्राउ परेका अभियुक्तहरुलाई प्रहरीले सार्वजनिक समेत गरेको छ । पत्रकार सम्मेलनमा लागु औषध ओसार पसार, विक्री वितरण, हातहतियार र जवरजस्ती करणीमा संलग्न व्यक्तिहरु पक्राउ गरि सार्वजनिक गरेको हो ।
पक्राउ पर्नेमा हरिहरपुरगढी गाउँपालिकामा २०७६ साल चैत्र २८ गते २४ बर्षिया महिलालाई बलात्कार गरि फरार रहेका ५ जना मध्ये मरिण गाउँपालिका ३ का अविनाश घिसिङ भन्ने अमन लो, सर्लाही लालबन्दी नगरपालिका ७ का २२ बर्षिय राज पाख्रीन रहेका छन । उनीहरुलाई फागुन १५ गते काठमान्डौबाट पक्राउ गरिएको हो ।
यस्तै २०७६ साल फागुन २० गते श्रीमतीलाई जवरजस्ति करणी गर्ने श्रीमान पक्राउ परेका छन् । श्रीमतीले दिएको उजुरीका आधारमा फरार रहेका सिन्धुलीको दुधौली नगरपालिका ३ कालापानीका ३५ बर्षिय पुरुष पक्राउ परेको प्रहरीले जनायो ।
मरिण गाउँपालिका ६ प्रगतिटोल जंगलमा कटुवा पेस्तोल लुकाई राख्ने २६ बर्षिय साङ्गे तामाङ भन्ने सांगे दोङलाई यहि फागुन ९ गते प्रहरीले पक्राउ गरेको छ ।
लागु औषध ओसार प्रसारमा संलग्नलाई पनि प्रहरीले पक्राउ गरि सार्वजनिक गरेको छ । प्रहरीले यहि फागुन २० गते कमलामाई नगरपालिका ९ चुरे स्थित विपि राजमार्गमा सवारी चेक जाँच गर्दा महोत्तरीको रामगोपाल नगरपालिका ४ का २२ बर्षिय रामवली महत्तोलाई पक्राउ गरेको छ ।
ज ३ प २०४५ नम्बरको मोटरसाईकल चेकजाँच गर्ने क्रममा लागु औषध सहित रामवली पक्राउ परेपछि घटनामा संलग्न अरु व्यक्ति समेत पत्ता लगाई पक्राउ गरिएको प्रहरी उपरीक्षक तिम्सिनाले पत्रकार सम्मेलनमा बताए । उनका अनुसार रामवलीको साथबाट नाइट्राभेट २९ पत्तामा गरि जम्मा ४३४ ट्यावलेट लागु औषध समेत बरामद भएको छ ।
सोहि मुद्दामा लागु औषध ओसार प्रसारमा संलग्न महोत्तरीको बर्दिबास २ का २९ बर्षिय साजन विकलाई फागुन ९ गते, सर्लाहिको लालबन्दी नगरपालिका ४ बस्ने २७ बर्षिय उत्तम सुनचौरीलाई २०७७ बैशाख २१ गते र धनुषा जिल्ला मिथिला नगरपालिका ७ ढल्केवर बस्ने पुजन रसाईलिलाई यहि फागुन १४ गते प्रहरीले पक्राउ गरेको थियो ।
यस्तै यहि फागुन ७ गते सवारी चेक जाँचका क्रममा गोलन्जोर गाउँपालिका ५ खनियाखर्क अन्र्तगत विपि राजमार्गमा बागमति प्रदेश ०२–२–प.८१३१ नम्बरको मोटरसाइकलमा सवार काठमाण्डौ महानगरपालिका ३२ कोटेश्वर निवासी ४१ बर्षिय विकाश रायमाझी लागु औषध सहित पक्राउ परेका छन् ।
उनको साथबाट केएलएवि १०० एमएल बोतल ३०, डिआईएएलईएक्स १०० एमएल ३० वोत्तल, एनआइटिआरएविईटि – १० को ९ पत्तामा १३३ वटा ट्यावलेट, निट४०सुन–१० को १० वटा ट्यावलेट भएको १ पत्ता, निट्जाकेयर–१० नाम गरेको २ पत्तामा १५ ट्यावलेट गरि १५८ वटा ट्यावलेट बरामद गरिएको जिल्ला प्रहरी कार्यालय सिन्धुलीले जनाएको छ ।
