सिन्धुली । सिन्धुलीका ५ जनामा कोरोना संक्रमण पुष्टि भएको छ । संक्रमण पुष्टि भएका सबै कमलामाई नगरपालिका भित्रका रहेका छन । शनिबार कमलामाई नगरपालिका वडा नं. ६ का ३२ र ५० वर्षिय पुरुष, कमलामाई नगरपालिका वडा नं. ७ का ७ वर्षिय बालिका, कमलामाई ९ का ५७ वर्षिय पुरुष, कमलामाई १२ का ३३ वर्षिय पुरुषमा संक्रमण देखिएको हो ।
संक्रमित ५ जना मध्ये ४ जना समुदायका रहेका छन । कमलामाई १२ का ३३ पुरुष भने क्वारेन्टाईनमा रहेका पुरुष हुन । भदौ ८ गते हेटौडामा परिक्षणका लागि स्वाव पठाईएका मध्येमा ५ जनाको रिपोर्ट पोजेटिभ आएको स्वास्थ्य कार्यालय सिन्धुलीका प्रमुख जितेन्द्र कुमार शाहले बताए । उनका अनुसार अन्य ४ जना कन्ट्रयाक ट्रेसिङमा परेका व्यक्ति रहेका छन ।
नयाँ संक्रमित मध्ये ३ जना होम आइसोलेसनमा रहेका छन भने २ जनालाई एपोलो अस्पतालमा बनाईएको आईसोलेसनमा उपचारका लागि ल्याईएको सिन्धुली अस्पतालका व्यवस्थापक बिमल श्रेष्ठले बताएका छन ।
उनीहरु सहित जिल्लामा संक्रमितको संख्या ५२ जना पुगेको छ । ती मध्ये २८ जना उपचारपछि घर फर्केका छन भने २० जना उपचाररत रहेका छन । उपचाररतमध्ये ९ जना होम आईसोलेसनमा रहेका छन । एपोलो अस्पतालमा ९ जना र सिन्धुली अस्पतालमा २ जना उपचाररत रहेका छन । संक्रमित सबैको स्वास्थ्य अवस्था सामान्य रहेको सिन्धुली अस्पतालले जनाएको छ ।
समुदायमा संक्रमण फैलदै
जिल्लामा पछिल्लो समय समुदायमा कोरोना संक्रमण बढ्दै गएको पाईएको छ । सुनकोशी गाउँपालिका र कमलामाई नगरपालिकामा समुदायमा कोरोना संक्रमण फैलन थालेको हो । हालसम्म समुदायमा १४ जनामा कोरोना संक्रमण देखिएको छ । कन्ट्रयाक ट्रेसिङमा भेटिएका ती संक्रमितमध्ये सुनकोशी गाउँपालिकाका २ जना र अन्य कमलामाई नगरपालिकाका रहेका छन ।
