सिन्धुली । कमलामाई नगरपालिकाले नगरपालिकाका सुत्केरी महिलालाई कोभिड १९ को संक्रमणका बेला घ्यू राहत दिन सुरु गरेको छ । कोभिड १९ का अवधिमा सुत्केरी भएका नगरपालिकाका सुत्केरी महिलाहरुलाई राहत वितरण शुक्रबारदेखि सुरु गरिएको हो ।
शुक्रबार कमलामाई नगरपालिकाका वडा नं. ८, ९, १०, १३ र १४ नं. वडाका ५२ जना सुत्केरी महिलालाई एक एक किलोका दरले घ्यू वितरण गरिएको छ । स्थानीय स्वास्थय संस्थाको समन्वयमा महिलाहरुलाई घ्यू राहत दिईएको कमलामाई नगरपालिकाले जनाएको छ ।
कमलामाई नगरपालिकाका उपप्रमुख मञ्जु देवकोटाको अध्यक्षता तथा सम्वन्धित वडाका वडा अध्यक्ष र कर्मचारीको उपस्थितिमा वडा नं. ८ मा १८ जना, वडा न. ९ मा १२ जना, वडा न. १० मा ६ जना, वडा न. १३ मा ३ जना र वडा न. १४ मा १३ जना गरि ५२ जना सुत्केरी महिलालाई घ्यू वितरण गरिएको हो ।
लकडाउनको स्थितिमा सुत्केरी महिलाहरुलाई राहत मिलोस भन्ने हेतुले कमलामाई नगरपालिकाको विपद व्यवस्थापन निर्देशक तथा समन्वय समितिको वैठकको निर्णय अनुसार राहत वितरण गरिएको नगरपालिकाका उपप्रमुख मञ्जु देवकोटाले बताईन ।
उनका अनुसार पहिलो चरणमा चैत्र ११ गते देखि हालसम्म सुत्केरी भएका महिलाहरुलाई उक्त राहत वितरण गरिएको हो । बाँकी अन्य वडामा पनि वडास्तरमै गई राहत बाँडिने उनले बताएका छिन ।
