सिन्धुली । जिल्ला विपद् व्यवस्थापन समिति सिन्धुलीले सिन्धुली जिल्लाको यस वर्षको विपद् पूर्व तयारी तथा प्रतिकार्य योजना अध्यावधिक गरी सार्वजनिक गरेको छ ।
शुक्रबार जिल्ला विपद् व्यवस्थापन समितिको बैठकमा बसी विपद् पूर्वतयारी तथा प्रतिकार्य योजना २०७७ को अनुमोदन गरिएको हो । विपद् पूर्वतयारी तथा प्रतिकार्य योजना २०७६ लाई परिमार्जन गरि जारी गरिएको योजनाको परिमार्जनको काम विभिन्न सरोकारवाला निकायको समन्वयमा नेपाल रेडक्रस सोसाईटी सिन्धुलीले गरेको थियो ।
अध्यावधिक योजनामा हाल महामारीको रुपमा रहेको कोरोना भाइरसको सहज व्यवस्थापन गर्नका लागि स्रोत साधनको उचित परिचालन गर्ने, प्रतिकार्य संयन्त्र प्रणालीको निर्माण गर्ने तथा उपचारात्मक कार्यलाई तयारी अवस्थामा राख्ने, राजमार्गहरुमा हुने सडक दुर्घटनाका कारण हुने क्षति न्यूनिकरणका लागि निश्चित दुरी कायम गरी ठूला उपकरणलाई तयारी अवस्थामा राख्ने, खोज तथा उद्धार कार्य छिटो र सहज बनाउनका लागि ड्रोन खरिद गर्ने लगायतका कार्यहरु थप गरिएको छ ।
गत वर्षको कार्ययोजनामा थप गरिएका योजनाको बारेमा नेपाल रेडक्रस सोसाइटी सिन्धुली जिल्ला शाखाका सभापति अशोक श्रेष्ठले बैठकमा जानकारी गराएका थिए ।
कार्यक्रममा जिल्ला विपद् व्यवस्थापन समितिका अध्यक्ष एवम् प्रमुख जिल्ला अधिकारी योगेन्द्र प्रसाद पाण्डेले विपद् पूर्वतयारी तथा प्रतिकार्य योजना अध्यावधिकको क्रममा प्रत्यक्ष सहभागी भई सहयोग गर्ने सम्पूर्ण कार्यालय, संघ तथा संस्थाहरु र बैठकमा सहभागी सम्पूर्ण सदस्यहरु तथा आमन्त्रित सबैलाई धन्यवाद समेत दिएका छन ।
बैठकले उक्त कार्ययोजनाको अनुमोदन गरि प्रकाशनको जिम्मा समेत नेपाल रेडक्रस सोसाईटी सिन्धुलीलाई दिएको छ ।
नेपाल रेडक्रस सोसाइटी सिन्धुली जिल्ला शाखाले वि.सं. २०६८ सालदेखि नै विपद् पूर्वतयारी तथा प्रतिकार्य योजनामा प्राविधिक सहयोग गर्दै आइरहेको छ ।
