सिन्धुली । प्रेम दिवसमा आफुले राखेको प्रेम प्रस्ताव अस्वीकार भएपछि शुक्रबार विहान साढे सात बजे सिविल ड्रेसमा रहेका प्रहरी जवानले ड्युटीमा रहेकी महिला प्रहरीको थ्रिनटथ्रि राईफल तानी आफैलाई गोली हानेर आत्महत्याको प्रयास गरेका छन ।
जिल्ला प्रहरी कार्यालय सिन्धुलीमा कार्यरत प्रहरी जवान रामनगर बहुअर्वा गाउँपालिका वडा नं. ६ घर भएका २२ वर्षिय चन्द्रकिशोर रायले प्रमुख जिल्ला अधिकारी जनार्दन गौतमको निवासको गेटमा ड्युटीमा रहेकी एक महिला प्रहरीको राईफल तानी आफैलाई गोली हानेका हुन ।
बन्दुकको गोली पेटको दाहिने कोखामा लागेर उनी शक्त घाइते भएका छन । रायको सिन्धुली अस्पतालमा प्राथमिक उपचार गरि थप उपचारका लागि प्रहरी अस्पताल काठमान्डौ रिफर गरिएको सिन्धुली अस्पतालले जनाएको छ ।
ड्युटीमा रहेकी प्रहरी जवान महिलाको राईफल खोसी आफैलाई गोली हानेको जिल्ला प्रहरी कार्यालय सिन्धुलीले पुष्टि गरेको छ । जिल्ला प्रहरी कार्यालय सिन्धुलीका डिएपी श्याम बहादुर खत्रीले घाइते प्रहरी जवानले आफैले आफैलाई गोली हानेको स्वीकार गरेको बताएका छन । उनले घटनाको थप अनुसन्धान भईरहेको बताए ।
उनले भने, ‘हस्पिटलमा उपचाररत रहँदा घाइते प्रहरी बोलिरहेका थिए । उनले मैले आफै गोली हानेको हुँ भनेका छन । हामीले भिडियो समेत खिचेका छौं ।’
स्रोतका अनुसार ती महिला प्रहरीलाई रायले निकै नै मन पराउँथे र विवाह गर्ने समेत जिल्ला प्रहरी कार्यालय सिन्धुलीमा जानकारी गराएका थिए । सोहि कारणले भ्यालेन्टाईन डे को दिन विहानै घटना भएको हुन सक्ने स्रोतले जनायो । तर जिल्ला प्रहरी कार्यालय सिन्धुलीले भने यो विषयमा केहि खुलाउन चाहेको छैन ।
