सिन्धुली । जिल्ला लघु उद्यमी संघ (डिमेगा) सिन्धुलीले ६ जना सफल लघु उद्यमीहरुलाई सम्मान गरेको छ । डिमेगाले मंगलबार सिन्धुलीमाढीमा सम्पन्न ११ औं वार्षिक साधारणसभा एवम पाँचौ अधिवेशनका अवसरमा सिन्धुलीमा सफल भएका उद्यमीहरुलाई सम्मान गरेको हो ।
सम्मानित हुनेमा बाँस वस्तु हस्तकला उद्यममा सफल हुने सन्त बहादुर भुजेल र खड्ग बहादुर श्रेष्ठ, सिलाई कटाई तर्फ ज्ञानकुमारी कार्की र टलकीमाया श्रेष्ठ, ढाका तर्फ बेलीमाया गिनेल र फाईबर उद्योग तर्फ नमुना फाईबर झोला उद्योगलाई सम्मान गरेको हो ।
यस्तै डिमेगाले संस्थालाई सफल बनाउन योगदान दिएको भन्दै राष्ट्रिय लघु उद्यमी महासंघ नेपाल, प्रादेशिक लघु उद्यम विकास विशेषज्ञ चन्द्र बहादुर भुजेल र झलक बहादुर थापालाई प्रशंसा पत्र प्रदान गरेको छ । सम्मानित हुनेहरुलाई बाग्मति प्रदेश सदस्य विनोद खड्काले सम्मान गरेका थिए ।
डिमेगाका अध्यक्ष तोतादेवी बोगटीको अध्यक्षता एवम वाग्मति प्रदेश सदस्य विनोद खड्काको अध्यक्षतामा भएको उद्घाटन कार्यक्रममा बोल्दै खड्काले डिमेगाले लघु उद्यमीहरुलाई रोजगार बनाई वेरोजगारीलाई क मगर्न योगदान दिएको बताए । उनले स्वदेशी उत्पादनलाई बढावा दिई रोजगारी सृजना गरिरहेका उद्यमीहरुलाई तीनै तहका सरकारले प्राथमिकता दिई लगानी गर्नुपर्नेमा जोड दिए ।
कार्यक्रममा बोल्दै कमलामाई नगरपालिका सिन्धुलीका मेयर खड्ग खत्रीले श्रम र मेहनतलाई सम्मान गर्ने संस्कारको विकास नभएसम्म लघु उद्यमहरु नफस्टाउने बताए । उनले उद्यमीहरुको विकास र बजारीकरणका लागि नगरपालिकाले लगानी गर्ने बताउँदै दिर्घकालिन व्यवसाय गरि आर्थिक संमृद्धिका लागि समूहमा मिलेर ठूला उद्योग खोल्न उद्यमीलाई प्रोत्साहन र लगानी आवश्यक रहेको बताए ।
कार्यक्रममा बोल्दै राष्ट्रिय लघु उद्यमी महासंघ नेपालका अध्यक्ष केशा परियारले राजनीतिले ढुंगा हान्न मात्र सिकाएको बताउँदै आय आर्जनमा जोड्न नसकेको बताईन । उनले लघु उद्यमीहरुलाई राजनीतिक तह, नीति निर्माण तहमा र राजनीतिक कार्यकर्तालाई उद्यमशिल बनाउन लाग्नुपर्ने बेला आएको बताईन । उनले स्थानीय तहले उद्यमशिलतामा लगानी गर्न आवश्यक रहेको समेत बताईन ।
कार्यक्रममा वन तथा वातावरण मन्त्रालयका शाखा प्रमुख उमाकान्त जैसवाल, युएनडिपी जनकपुरका धन बहादुर चन्द, मेड्पा बाग्मति प्रदेशका चन्द्र बहादुर भुजेल, प्रदेश लघु उद्यमी महासंघका महासचिव मदन मग्राती, घरेलु तथा साना उद्योग महासंघका अध्यक्ष भिष्मराज श्रेष्ठ लगाएतले मन्तव्य व्यक्त गरेका थिए ।
कार्यक्रममा बार्षिक कार्यक्रम तथा प्रगति प्रतिवेदन डिमेगाका अध्यक्ष तोतादेवी बोगटीले प्रगति विवरण प्रस्तुत गरेकी थिइन भने कोषाध्यक्ष पुष्पा धामीले आर्थिक प्रतिवेदन पेश गरेकी थिईन ।
डिमेगाको अध्यक्षमा पुनः बोगटी
डिमेगाको अध्यक्षमा पुनः तोतादेवी बोगटी निर्विरोध निर्वाचित भएकी छिन । मंगलबार सिन्धुलीमाढीमा भएको ११ औं साधारणसभा तथा पाँचौ अधिवेशनबाट बोगटी सर्वसम्मत अध्यक्ष भएकी हुन । उनी तेस्रो पटक अध्यक्षमा चयन भएकी हुन ।
बोगटीका अध्यक्षतामा ९ सदस्यीय नयाँ कार्यसमिति समेत निर्विरोध चयन भएको छ । जसको उपाध्यक्ष होमकुमारी ठकुरी, सचिव सन्त बहादुर भुजेल, कोषाध्यक्ष पुष्पा धामी, सहसचिव विन्दा भट्टराई चयन भएका हुन । यस्तै कार्य समितिको सदस्यमा खड्ग श्रेष्ठ, बेलीमाया गिनेल मगर, निर्मला परियार र कृष्णमाया घिसिङ चयन भएका छन ।
