सिन्धुली । शनिबार दुधौली नगरपालिका वडा नं. १ टोड्केपानी जंगलमा ट्रयाक्टर दुर्घटना हुदा एक जनाको मृत्यु भएको छ । उक्त दुर्घटनामा परि १३ जना घाइते भएका छन ।
डकाहा चकमके सडक खण्डको उक्त जंगलबाट दाउरा लिएर डकाहा तर्फ आउँदै गरेको लु ८३ त ६८९० नम्बरको ट्याक्टर ब्रेक फेल भई दुर्घटना हुदा दुधौली १ गिचियानीका ७० वर्षिय ब्रमलाल धामीको घटना स्थलमै मृत्यु भएको हो ।
घाइतेमध्ये ३ जनाको अवस्था अत्यन्तै गम्भिर रहेको जिल्ला प्रहरी कार्यालय सिन्धुलीका सूचना अधिकारी डिएसपी श्याम बहादुर खत्रीले बताए ।
अन्य ५ जना मध्यम र बाँकी सामान्य घाइते भएको उनले बताए । गम्भिर घाइते हुनेमा दुधौली नगरपालिका – १ का राम भरोसा धामी, सोही स्थानका रामकुमार धामी र शुक्ला धामी रहेको र उनीहरुको टाउकोमा गम्भिर चोट देखिएको प्रहरीले जनाएको छ ।
यस्तै अन्य घाईतेमा दबु धामी, दिपेश (राजन) पुरी, सिता धामी, मिरा धामी, सुनिता चौधरी र मनिसा कुमँर, कुमारी कुमर, रामकुमार कुमँर र चालक कुल बहादुर तामाङ रहेको प्रहरीले जनाएको छ । घाइतेहरुको प्राथमिक उपचार स्थानीय स्वास्थ्य संस्था गरि सिन्धुली अस्पतालमा उपचारका लागि ल्याइएको छ ।
गम्भिर घाइतेमध्ये २ जनालाई थप उपचारका लागि काठमान्डौ पठाईएको सिन्धुली अस्पतालले जनाएको छ । घाइतेमध्ये राजन पुरी र रामकुमार धामीलाई थप उपचारका लागि काठमान्डौ रिफर गरिएको सिन्धुली अस्पताल विकास समितिका अध्यक्ष प्रलाद कुमार पोखरेलले जानकारी दिए ।
