सिन्धुली । जिल्लाको मरिण र हरिहरपुरगढी गाउँपालिकामा प्रहरीले गत वर्षहरुमा जस्तै यस वर्ष पनि गाँजा फँडानी सुरु गरेकोे छ । यो वर्ष प्रहरीले मरिण गाउँपालिका वडा नं. ३ का विभिन्न ठाउँमा लगाएको ३ विघा क्षेत्रफलको गाँजा खेति फँडानी गरेको जनाएको छ । उक्त वडाको बरुण भलायो, ईनारटोल लगाएतका स्थानमा लगाईएको गाँजा नष्ट गरिएको जिल्ला प्रहरी कार्यालय सिन्धुलीले जनाएको छ ।
जिल्ला प्रहरी कार्यालय सिन्धुलीका एसपी रञ्जु सिग्देलका अनुसार गाजाँ फाँड्न २१ जनाको प्रहरी टोली खटाइएको छ । टोली गाँजा खेति भएका थप सम्भावित स्थानहरुको खोजी गरिरहेको समेत उनले बताईन । उक्त टोलीले मरिण क्षेत्रबाट ४ क्विन्टल तयारी गाँजा समेत बरामद गरि नष्ट गरेको छ । 
सिग्देलका अनुसार प्रहरीलाई विभिन्न सवारी साधनमा गाँजा सप्लाई भईरहेको जानकारी आएकाले त्यसतर्फ पनि निगरानी बढाईएको छ । गाँजा उत्पादन हुने क्षेत्रमा प्रहरी टोली खटाईएको र गाँजा नष्ट गर्ने काम भईरहेको उनले बताईन । उनले भनिन, ‘गाँजा नष्ट नहुन्जेल प्रहरीले निरन्तर गाँजा फँडानी गर्ने छ ।’
प्रहरी टोलीले मात्र गाजा फडानी गर्न नसक्ने बताउँदै सिग्देलले स्थानीय तथा गाँजा फँडानी गर्नका लागि मेसिनकै आवश्यकता रहेको बताएकी छिन । उनले भनिन, ‘मान्छेले फाँडेर मात्र गाँजा सकिने अवस्था छैन, मेसिनकै आवश्यकता छ ।’ 
अघिल्लो बर्ष मरिण क्षेत्रमा प्रहरीले १ सय २१ विघामा लगाएको गाँजा फँडानी गरेको थियो । मरिण गाउँपालिकाका ग्रामीण क्षेत्रहरुमा कृषि जेटिय सहित राखेर गाजा खेती हुने गरेको छ । केही स्थानीयको जग्गा भाडामा लिएर गाँजा खेती हरेक बर्ष हुदै आएको छ ।
प्रहरीले हरेक बर्ष अवैध रुपमा लगाईएको गाँजा खेती नष्ट गर्दै आए पनि गाँजा लगाउनेलाई पहिचान गरि कारवाहि भने गर्ने गरेको छैन ।
यस्तै गाँजा फँडानी गरि नष्ट गर्न र ओसार पसारको निगरानी बढाउन प्रमुख जिल्ला अधिकारीले एसपी रञ्जु सिग्देललाई अनुरोध समेत गरेका छन ।
