सिन्धुली । प्रदेश नं. ३ का सांसद विनोद खड्काले भुकम्पपछि नागरिकका दुई खाले घर भएको बताए । उनले ‘भुकम्पको घर’ र व्यक्तिको घर फरक फरक बनेको बताए । सरकारले पुननिर्माणमा बनेका नीति तथा कानुनहरु उचित नबन्दा र फेरवदल भईरहदा व्यक्तिले सुरक्षित घर नबनाएको र अनुदानलाई सहि सदुपयोग नगरेको उनले बताए ।
ट्रान्परेन्सी इन्टरनेशनलले सोमबार सिन्धुली माढीमा आयोजना गरेको भुकम्पपछिको पुननिर्माण तथा पुनःस्थापनामा सदाचार नीति, प्रगति र चुनौति विषयक छलफल कार्यक्रममा बोल्दै खड्काले सरकारले कडाई गर्न नचाहेककाले भुकम्पपीडितको नीजि आवास निर्माणको प्रगति न्युन भएको बताए । उनले सरकारको नीति भुकम्प प्रतिरोधी उपयोगी घर बनाउनेमा भन्दा पनि भुकम्पको घर बनाउनेमा केन्द्रीत देखिएको बताए ।
कार्यक्रममा बोल्दै ट्रान्परेन्सी इन्टरनेशनलका अध्यक्ष खेमराज रेग्मीले नीतिगत त्रुटिमा भएको अपारदर्शिताका कारण पुनःनिर्माणमा समस्या भएको बताए । उनले नैतिकता भित्र रहेर पुननिर्माणका सरोकारवालाले काम नगरेको आरोप लगाए । उनले भुकम्पले जनतालाई समेत भ्रटाचार गर्न सिकाएको बताए ।
नेपालमा राजनीतिक दल, कर्मचारी र न्यायालयमा व्याप्त भ्रष्टाचार अव भुकम्प लाभग्राहीमा समेत आएको भन्दै ३ लाखमा कमिसन खाएर एक कोठे घर बनाउनेलाई र त्यस्तो घर सिफारिस गरि पास गर्नेलाई कारवाहिको दायरामा ल्याउन आग्रह गरे । रेग्मीले भुकम्पको नीति सोंचेर नबनाएको र पटक पटक हुने फेरवदलले पनि पुननिर्माणले गति लिन नसकेको बताएका छन ।
कार्यक्रममा बोल्दै जिल्ला समन्वय समितिका प्रमुख शंकरराज बर्मा तिवारीले भुकम्पका घरमा धेरै मान्छे नबसेको बताए । उनले बैंकले सहुलियत ऋण समेत नदिएको भन्दै बैंकको ऋण लगानीमा तदारुकता देखाउन आग्रह समेत गरे ।
छलफलका क्रममा पुननिर्माणका सवालमा जिल्लामा भएका कामहरुका बारेमा जिल्ला आयोजना कार्यान्वयन ईकाई (भवन)का इन्जिनियर दिनेश सन्जेल, जिल्ला आयोजना कार्यान्वयन ईकाई (अनुदान व्यवस्थापन तथा स्थानीय पूर्वाधार) का प्रमुख सूर्य प्रकाशक विष्ट, जिल्ला आयोजना कार्यान्वयन ईकाई (शिक्षा) का शिव कुमार सापकोटा लगाएतले प्रस्तुतीकरण गरेका थिए ।
कार्यक्रममा सहभागिहरुले पुनःनिर्माणमा ढिलाई हुनुको प्रमुख कारण ऐलानी तथा भूमिहिनहरुको समस्या, रेक्ट्रोफिटिङमा स्पष्ट नीति नहुनु, काठका घरका नक्सा आउन ढिलाई हुनु तथा नीतिगत रुपमा र तथ्यांकगत रुपमा भएका त्रुटिहरु प्रमुख रहेको बताएका थिए ।
