सिन्धुली । अन्तराष्ट्रिय युवा दिवस २०१९ का अवसरमा सिन्धुलीमा विभिन्न विधाका व्यक्तिहरुलाई सम्मान गरिएको छ । जिल्ला युवा सञ्जाल सिन्धुलीले एक औपचारिक कार्यक्रममा पत्रकारदेखि कलाकारसम्मलाई सम्मान गरेको हो ।
सोमबार सिन्धुलीमाढीमा आयोजिक कार्यक्रममा पत्रकार सुजता लामा, महिला अधिकारकर्मी पार्वती भट्टराई, युवा व्यवसायी सिताराम पहाडी, कलाकार सोनाम बज्यू, साहित्यको क्षेत्रबाट बरुण लामिछाने, खेलकुद क्षेत्रबाट देवराज खड्कालाई सम्मान गरिएको हो ।
जिल्लाका सफल युवाहरुलाई सम्मान गरिएको आयोजकले जनाएको छ । जिल्लाका विभिन्न क्षेत्रमा उल्लेखनिय योगदान पु¥याई सफल भएका व्यक्तित्वहरुलाई सम्मान गरिएको सञ्जालले जनाएको छ ।
‘शिक्षामा रुपान्तरण : उद्यमशीलता र नवप्रवर्तन’ भन्ने मूल नाराका साथ अन्तराष्ट्रिय युवा दिवस २०१९ मनाईएको हो । सञ्जालका अध्यक्ष रामकाजी घलानको अध्यक्षता तथा प्रदेश नं. ३ का सांसद राजन दाहालको प्रमुख आतिथ्यतामा भएको कार्यक्रममा बोल्दै दाहालले युवाहरु सृजनशिल हुनुपर्नेमा जोड दिए । उनले युवाहरु सिप सहितको ज्ञान आर्जन गर्ने तर्फ लाग्नुपर्नेमा जोड दिए । उनले युवाहरु योग्य, इमान्दार र उत्तरदायि भए मात्र देशको विकास हुने बताए ।
यस्तै दिवसका अवसरमा पर्यावरणीय चुनौति र समाधानका लागि युवाको भूमिका विषयक क्याम्पस स्तरीय वक्तित्वकला प्रतियोगिता सम्पन्न भएको छ । प्रतियोगितामा सिद्धज्योती शिक्षा क्याम्पसका तृष्ण लामिछाने प्रथम भए भने मानव श्रोत विकास कृषि क्याम्पस कपिलाकोटका अस्मि सापकोटा द्धितिय, सिन्धुली बहुमुखी क्याम्पस ढुंग्रेबासका बुद्ध कार्की तृतिय र जनज्योती शिक्षा क्याम्पस खुर्कोटका घनश्याम सार्की सान्तोना भएका छन् ।
