दशैं तिहारका बेला स्थानीय प्रशासनले हरेक वर्ष बजार अनुगमन गर्दै आएको छ । यस वर्ष पनि स्थानीय प्रशासनले अनुगमन सुरु गरिसकेको छ । चाडपर्वका बेलामा कालोबजारी, ठगीले निकै प्रश्रय पाउने गर्छ । यसैलाई मध्यनजर गरि गरिने अनुगमन पनि प्रभावकारी भएका पाइदैनन । बरु त्यस्ता अनुगमन औपचारिकतामा मात्र सिमित हुने गरेका छन ।
पछिल्लो समय सिन्धुलीमा कुनै पनि सामानको मुल्यमा एक रुपता छैन । मुल्य सूचि कुनै पनि पसलहरुमा पाइदैन । खाद्यान्न तथा मिठाई पसलहरु, होटलहरुमा गुणस्तरीयता र सरसफाईमा सधै प्रश्न चिन्ह खडा भएको पाइन्छ । मिति सकिएका खानेकुराको विगविगी छ । यता नापतौलका सामानमा समेत एकरुपता र पारदर्शिता देखिदैन । ढुंगा र काठका टुक्राले नापतौल गर्दा कति प्रभावकारी हुन्छ ? यो सहजै अनुमान गर्न सकिन्छ । अनि अनुगमन टोली यसबारे मौन बस्छ । यस्तो परिस्थितिमा हुने अनुगमन र व्यवसायीहरुको मनोमानीका कारण मानवीय स्वास्थ्यमा समेत असर परिरहेको छ भने कालोबजारी मौलाउँदै जाँदा उपभोक्ता मारमा परिरहेका छन ।
विषय विज्ञ विना गरिने अनुगमनले उचित रिजल्ट पनि दिन सक्दैन । विज्ञ विना गरिने अनुगमन र अनुगमनमा पाइएका विषय सार्वजनिक गर्न समेत स्थानीय प्रशासनले गर्ने आनाकानीले पनि यस्ता अनुगमनमा उपभोक्ताले विश्वास गर्न छोडेका छन । यस्तै मानवीय स्वास्थ्यमा प्रतिकुल असर पार्ने गरि विक्री हुने सामग्री र तिनीहरुलाई गरिने कारवाहिका विषयमा स्थानीय प्रशासन मौन बस्ने परिपाटीले समेत उपभोक्ताले फगतको अनुगमन भनिरहेका छन । यस्ता अनुगमन आम उपभोक्ताले विश्वास गर्न नसक्ने तरिकाले गरिदा अनुगमन प्रक्रिया माथि नै प्रश्न चिन्ह खडा भएको छ ।
यता वर्षको चारपटक कम्तिमा अनुगमन हुनुपर्ने बजारमा चाडपर्वमा मात्र अनुगमन हुदा हुने अविश्वासलाई हटाउन स्थानीय प्रशासन तयार रहनुपर्छ । विषय विज्ञ सहितको प्रभावकारी अनुगमन, कालोबजारी तथा मानवीय स्वास्थ्यमा संलग्नलाई कारवाहि जबसम्म हुदैन अनुगमन अनुगमनमा मात्र सिमित हुन्छ । अतः यस पटकको अनुगमन प्रभावकारी बनोस्, औपचारिकतामा सिमित नबनोस ।
