सिन्धुली/जिल्लाका मानवअधिकार तथा महिला अधिकारकर्मीले मानवअधिकारको संरक्षणको माग गर्दै जिल्ला प्रशासन कार्यालय सिन्धुलीमा ज्ञापन पत्र बुझाएका छन । बुधबार बुझाईएको ज्ञापनपत्रमा महिला तथा बालिका विरुद्ध बढ्दै गएका बलात्कारजन्य अपराध, महिला हिंसा, घरेलु हिंसा, तथा अन्य मानवअधिकार विरोधी घटनाका दोषीलाई विना संरक्षण कारवाहिको दायरामा ल्याउन माग माग गरिएको छ ।
अधिकारकर्मीहरुले प्रमुख जिल्ला अधिकारी ज्ञानप्रसाद ढकाललाई जुनसुकै बाहनामा हुने मानवअधिकार विरोधी घटनामा छिटो, छरितो र प्रभावकारी न्याय दिलाउनका लागि प्रहरीले गर्ने अनुसन्धान प्रभावकारी र निश्पक्ष बनाउन माग समेत गरेका छन । जिल्ला स्तरीय मानवअधिकार सञ्जाल सिन्धुली र महिला मानवअधिकार सञ्जाल सिन्धुलीले संयुक्त रुपमा बुझाएको ज्ञापनपत्रमा उपभोक्ता अधिकार, खाद्य अधिकार र मानवीय स्वास्थ्यलाई समेत मध्येनजर गरि चाडपर्वका बेलामा हुने खाद्य मिसावट, महंगी र कालोबजारी नियन्त्रण गर्न स्थानीय प्रशासनको ध्यानाकर्षण समेत गरिएको छ ।
‘लोकतन्त्रको संस्थागत विकासको एक सिक्का रहेका नेपाली महिलाहरु यसरी दिनहुँ विभिन्न बाहनामा मारिनु, बलात्कृत हुनु वा हरेक खालका हिंसामा पर्नुले जिल्लाका मानवअधिकारकर्मीहरुलाई गम्भिर बनाएको छ, ज्ञापनपत्रमा उल्लेख गरिएको छ । जिल्लामा मानवअधिकारका विरोधी घटनाहरु वृद्धि भएको र चाडपर्वका बेलामा यसता घटना बढ्न सक्ने भन्दै अधिकारकर्मीहरुले स्थानीय प्रशासनलाई संवेदनशिल हुन आग्रह समेत गरेका छन ।
जिल्लास्तरीय मानवअधिकार सञ्जालका संयोजक द्वारिका काफ्ले र महिला मानवअधिकार रक्षक सञ्जाल सिन्धुलीका अध्यक्ष भद्रा राजभण्डारीले हस्ताक्षर गरेको ज्ञापनपत्र दुवैजनाले संयुक्त रुपमा बुझाएका छन । यस्तै बलात्कार विरुद्ध सिन्धुलीमा संकलन गरिएको हस्ताक्षर समेत प्रमुख जिल्ला अधिकारी ढकाललाई बुझाईएको छ ।
जिल्ला प्रशासन कार्यालयमा बmुझाईएको ज्ञापनपत्रमा पाँच बुँदे माग समेत राखिएको छ । जसमा संविधानले ज्ञारेन्टी गरेका मौलिक हक र अन्य कानुनहरुको पालना गर्न गराउन जिल्लामा स्थानीय प्रशासनको तर्फबाट प्रभावकारी भूमिका निर्वाह गर्न, चाडपर्वका बेलामा यातायातमा हुने मनपरी भाडा लिने र सिन्डिकेट गर्नेलाई कारवाहि गर्न समेत माग गरिएको छ ।
ज्ञापनपत्र तथा हस्ताक्षर बुझेपछि अधिकारकर्मीहरुसँग कुरा गर्दै प्रमुख जिल्ला अधिकारी ढकालले जिल्लामा क्रियाशिल मानवअधिकारकर्मीहरुले उठाएका माग जायज भएकाले कार्यान्वयनमा सक्दो प्रयास गर्ने प्रतिवद्धता जनाए । उनले ज्ञापनपत्रमा उल्लेखित केहि मागहरु कार्यान्वयन सुरु भईसकेका र केहि मागबारे आफु जिम्मेवार भएर कार्यान्वयनमा जाने प्रतिवद्धता व्यक्त गरे ।
