सिन्धुली । नेकपा एमालेका पोलिटव्युरो सदस्य एवम राष्ट्रिय युवा संघका इन्चार्ज महेश बस्नेतले एमालेलाई फसाउन सकिन्छ की भनेर प्रचण्ड नेतृत्वको सरकारले भ्रष्टाचारको फाईल खोलेको बताए । एमालेलाई फसाउन खोलिएको भ्रष्टाचारको फाईल प्रचण्ड र माओवादीसँग ठोक्किएर सकिने बस्नेतले दावी गरे ।
राष्ट्रिय युवा संघ नेपाल सिन्धुलीको नवौं जिल्ला अधिवेशनको आइतबार सिन्धुलीमाढीमा उद्घाटन गर्दै उनले यस्तो बताएका हुन । बस्नेतले एमालेलाई फसाउन खोलिएका भ्रष्टाचारका फाईलको अनुसन्धानको सुई शेरबहादुर देउवा, आरजु राणा, मञ्जु खाँड, माधव नेपाल, वर्षमान पुन, बाबुराम भट्टराई, कृष्णबहादुर महरा, नन्दकिशोर पुन, ओनसरी घर्ति लगाएत तिर तेर्सिएको बताए ।
बस्नेतले माओवादी नेताहरु क्रमशः भ्रष्टाचारमा मुछिन थालेपछि प्रचण्ड र नारायणकाजीको बोली बन्द हुन थालेको समेत बताए । उनले प्रचण्डले रेशम चौधरी, माधव नेपाल, उपेन्द्र कसैलाई पनि कारवाहि नगर्ने बताए । उनले भने, ‘उनीहरुलाई कारवाहि गर्दा सरकार ढल्छ कसरी कारवाहि गर्छन ।’
प्रचण्ड सरकारको फाईलवाला फिल्मको पहिलो चरण छिट्टै सक्किने बस्नेतको दावी रहेको छ । भ्रष्टाचारको पहिचान एमालेले गर्ने र भ्रष्टहरुका खलनायक प्रचण्ड लगाएतलाई आधुनिक जेल बनाउने समेत बताए ।
बस्नेतले नेकपा एमालेका अध्यक्ष केपी ओलीलाई पशुपतिको जलहरी काण्डमा आरोपित गर्ने राजन दाहालको योजना रहेको भन्दै प्रचण्डबाट पालित, पोषित राजन दाहाल आफ्नै अपराधका कारण जेल जाने ठोकुवा गरे । उनले साढे ९ किलो सुनकाण्डका महरा, पुन र घर्तिहरु जोगाउन एमाले अध्यक्ष र एमालेमाथि आरोप लगाईएको बताए । उनले नेकपा माओवादीका नेता एवम् सांसद राजन दाहाल फेक काण्ड बनाउने पात्र भएको आरोप लगाए ।
उनले एमालेहरु भ्रष्टाचारमा नजोडिएको र कोहि जोडिएको पुष्टि भए टोपबहादुर रायमाझीलाई जस्तै निलम्बन गरेर अनुसन्धानमा सघाउने बताए । उनले सुन तस्करीको जिपिएस माओवादी निकट नेताहरुको घरतिर गएको बताए ।
एमाले नेता बस्नेतले फेक काण्ड निकाल्ने र धम्काउने काम नगर्न प्रधानमन्त्री प्रचण्डलाई आग्रह समेत गरेका छन । उनले ओम्नी काण्ड, सेक्युरिटी प्रेस काण्ड, यति होल्डिङ काण्ड, ग्रिवन्धु टि स्टेट काण्ड लगाएतका सबै काण्ड छानविन गरेर देखाउन चुनौती समेत दिएका छन । उनले एमाले माथि गठबन्धन सरकारले लगाएका आरोप मैले नजन्माएको छोराको कथा जस्तै भएको समेत बताए ।
