सिन्धुली । विपी राजमार्ग र मदनभण्डारी राजमार्गको सिन्धुली खण्डमा एकैदिन चार वटा सवारी दुर्घटना भएका छन । शुक्रबार मदनभण्डारी राजमार्गमा २ र विपी राजमार्गमा दुईवटा दुर्घटना भएका हुन । दुर्घटनामा परि पाँचजना घाईते भएका छन भने एक वटा गाई समेत मरेको छ ।
मदनभण्डारी राजमार्ग अन्तर्गत दुधौली नगरपालिका नगरपालिका वडा नं. १० को गोलफेरा चोकमा इकोभ्यानले ठक्कर दिदाँ एकजना पैदलयात्रु घाईते भएका छन । उदयपुरको वेलटारबाट काठमान्डौ जाँदै गरेको बा१५च६१४७ नम्बरको भ्यानले दुनपा १० की ५० वर्षिय सिता कार्कीलाई बाटो काट्ने क्रममा ठक्कर दिएको हो । कार्कीको दुधौली प्रयाग अधिकारी हेल्थ केयरमा उपचार गरिएको छ । उनको अवस्था सामान्य रहेको प्रहरीले जनाएको छ ।
यस्तै मदनभण्डारी राजमार्ग अन्तर्गत दुधौली नगरपालिका वडा नं. २ रतनपुरमा ट्रकले गाईलाई ठक्कर दिएको छ । ट्रकको ठक्करबाट दुनपा २ का रामनारायण कुमँरको गाईको मृत्यु भएको प्रहरीले जनाएको छ । भिमानबाट दुधौली जाँदै गरेको ना७ख७२६ नम्बरको ट्रकले ठक्कर दिँदा गाईको घटनास्थलमै मृत्यु भएको जिल्ला प्रहरी कार्यालय सिन्धुलीले प्रेस विज्ञप्ती मार्फत जानकारी दिएको छ । मदनभण्डारी राजमार्गमा भएका दुवै दुर्घटनाका सवारी साधन प्रहरीको नियन्त्रणमा रहेका छन ।
शुक्रबार नै विपी राजमार्ग अन्तर्गत सुनकोशी गाउँपालिका वडा नं. २ टुपीडाँडामा इकोभ्यान पल्टिदा २ जना घाईते भएका छन । किताव र कापी बोकी काठमान्डौबाट सिन्धुलीतर्फ आउँदै गरेको प्रदेश ३–०१–०२२च००३५ नम्बरको भ्यान पल्टिदा चालक सिन्धुपाल्चोक वाह्रविसे नगरपालिका ९ बस्ने २० वर्षिय सिंहविर तामाङ र सोहि गाडीमा सवार तिनपाटन गाउँपालिका ८ का ४० वर्षिय पुण्यप्रसाद अधिकारी सामान्य घाईते भएका छन । घाईतेहरुको स्थानीय मेडिकलमा उपचार भईरहेको छ भने भ्यान प्रहरी नियन्त्रणमा रहेको छ ।
यस्तै विपी राजमार्ग अन्तर्गत सुनकोशी गाउँपालिका वडा नं. ५ को रिठ्ठभिर नजिक योद्धा पिकअप गाडीले मोटरसाईकललाई ठक्कर दिएको छ । काठमान्डौबाट सिन्धुलीतर्फ आउँदै गरेको नम्बर नखुलेको योद्धा पिकअप गाडीले सिरहाबाट काठमान्डौ जाँदै गरेको प्रदेश २–०१–००२प०४६० नम्बरको मोटरसाईकललाई ठक्कर दिदा मोटरसाईकल चालक र सोहि मोटरसाईकलमा सवार रहेका एकजना गरि दुई जना घाईते भएका छन ।
घाईते हुनेमा मोटरसाईकल चालक सिरहा कल्याणपुर नपा ११ बस्ने २२ वर्षिय प्रवीण कुमार शाह र मोटरसाईकलमा सवार रहेका धनुषा जनकपुर नपा १६ का ४२ वर्षिय मनोज कुमार शाह रहेको जिल्ला प्रहरी कार्यालय सिन्धुलीका डिएसपी चिरञ्जिवी दाहालले जानकारी दिए ।
