सिन्धुली । सिन्धुलीको मधुगंगा (लंगुरखोला) महादेव मन्दिर दर्शन गर्न आएका एक भारतीय तिर्थयात्रीको हिड्दै गर्दा बाटोमा लडेर मृत्यु भएको छ । आइतबार मन्दिर दर्शन गर्न जाने क्रममा बाटोमा लडेर उनको मृत्यु भएको हो ।
भारतको सितामडी चकमैला यादव चोकका करीब ३२, ३३ वर्षका सुनिल कुमार यादवको मृत्यु भएको जिल्ला प्रहरी कार्यालय सिन्धुलीले जनाएको छ । शनिबार राती दुधौली आएर बसेका उनी आइतबार विहान ५ बजे नै मधुगंगा महादेवका लागि पैदल यात्रामा गएका थिए ।
हिड्ने क्रममा यादव दुधौली नगरपालिका वडा नं. २ आँपडाँडामा लडेका थिए । उनको लडेर टाउकोमा चोट लागेर गम्भिर घाईते भएका थिए । घाईते यादवलाई सँगै तिर्थयात्रामा आएका उनका छोरा र स्थानीयले आँपभञ्ज्याङमा रहेको शहरी स्वास्थ्य क्लिनिकमा लगेकोमा क्लिनिकले उनलाई मृत घोषणा गरेको थियो । यादवको शव पोष्टमार्टमका लागि सिन्धुली अस्पताल ल्याईएको जिल्ला प्रहरी कार्यालय सिन्धुलीका एसपी राजकुमार सिलवालले जानकारी दिए ।
