सिन्धुली । नेपाल कम्युनिष्ट पार्टी (एमाले) सिन्धुलीको सचिवमा नारायण बराल निर्विरोध निर्वाचित भएका छन । नेकपा एमालेको सातौं जिल्ला अधिवेशनबाट बराल निर्विरोध निर्वाचित भएका हुन ।
अध्यक्षमा निवर्तमान अध्यक्ष प्रदीपक कुमार कटुवाल र रामकुमार कार्कीको प्रतिस्पर्धा हुने भएको छ । उपाध्यक्षमा विनोद कुमार खड्का, जगदिश्वर तोलाङ्गी र कर्णबहादुर घिसिङको उमेदवारी परेको छ ।
यस्तै अधिवेशनमा १७ जना खुल्ला महिला सदस्यहरु निर्विरोध निर्वाचित भएका छन । १९ जना महिला खुला सदस्य निर्वाचित हुनुपर्नेमा उमेदवारी नै १७ जनाको परेको थियो ।
अधिवेशनमा उमेदवारी दर्ता सकिएको छ । प्रारम्भिक जानकारी अनुसार अध्यक्ष, उपाध्यक्ष, सचिव १, उप सचिव २ जना सहित १ सय ५ जना जिल्ला कमिटिका लागि १ सय ४८ जनाको उमेदवारी परेको छ ।
दुई उपसचिवमा चार जनाको उमेदवारी परेको छ । खड्गबहादुर रजन, मन्जु देवकोटा, नवराज थिङ र रस्मीला देबकोटाले उपसचिवमा उमेदवारी दिएका छन ।
खुल्ला सदस्य ३३ जनाका लागि ५३ जनाको उमेदवारी परेको छ । अधिवेशनमा अहिले उमेदवारको नाम संसोधन, फिर्ता तथा दावी विरोधको गर्ने काम भईरहेको छ ।
जिल्ला अधिवेशनबाट नेतृत्व छनौटका लागि सर्वसम्मत गराउने प्रयास जारी रहेको बताइएको छ । सर्वसम्मत नभए आइतबार निर्वाचनका लागि मतदान प्रक्रिया थालिने निर्वाचन अधिकृत दाहालले बताए । शुक्रबारबाट सुरु भएको अधिवेशनका लागि ९ सय १५ जना प्रतिनिधि सहभागी भएका छन् ।
