सिन्धुली । जिल्लाको कमलामाई नगरपालिकामा भोली बुधबार रातीदेखि लागु हुने गरि निशेधाज्ञा जारी गरिएको छ । जिल्ला विपद व्यवस्थापन समितिको मंगलबार सिन्धुलीमाढीमा बसेको बैठकले बैशाख २२ गतेदेखि बैशाख २९ गतेसम्मका लागि नगरपालिकाका सबै वडा पूर्ण निशेधाज्ञा (लकडाउन) गर्ने निर्णय गरेको हो ।
प्रमुख जिल्ला अधिकारी सुरेश न्यौपानेको अध्यक्षतामा बसेको बैठकले कोभिड १९ संक्रमण अत्यधिक बढेकाले लकडाउन गर्ने निर्णय गरेको जिल्ला प्रशासन कार्यालय सिन्धुलीका प्रशासकीय अधिकृत भिम बस्नेतले बताए ।
यो सँगै दुधौली नगरपालिका, सुनकोशी गाउँपालिका, मरिण गाउँपालिका, गोलञ्जोर गाउँपालिका पूर्ण लकडाउन भएका छन भने तिनपाटन गाउँपालिका आंशिक लकडाउन भएको छ । कमलामाई नगरपालिकामा सबैभन्दा बढी कोरोना संक्रमित भेटिएका छन भने दुधौली र सुनकोशी त्यसपछिको प्रभावित स्थानीय तह हो ।
नयाँ भेरियन्ट सहितको कोरोनाका कारण जिल्लामा ११४ जना संक्रमित भएका छन । संक्रमित मध्ये १ सय ११ जनाले उपचार गराईरहेका छन । यस्तै जिल्लामा २ जनाले ज्यान गुमाएका छन ।
लकडाउनमा चल्न पाउने नपाउने सवारी
कमलामाईमा लकडाउनको अवधिमा एम्बुलेन्स, शववाहन, खाद्य सामग्री, औषधि, कुखुराको चल्ला, पशुपंक्षिको दाना बोकेको सवारी साधन, पानी दुध इन्धन फलफुल तरकारी बोकेका सवारी साधन, निर्माण सामग्री बोकेका सवारी साधन चल्नेछन ।
अत्यावश्यक कामका लागि सरकारी नम्बर प्लेट सवारी साधन, झण्डावाला सवारी, कुटनीतिक नियोगका सवारी साधन, प्रेस पास प्राप्त सवारी साधनहरु चल्न पाउने भएका छन ।
यस्तै नेपाल सरकारका कर्मचारी, बैंक वित्तिय संस्थाका कर्मचारी, सार्वजनिक संस्थानका कर्मचारीहरको हकमा कार्यालयले जारी गरेको परिचयपत्र लगाएर हिंड्न कर्मचारी सवार भएका सवारी साधनहरु, वैवाहिक कार्यक्रमका दुलाहा दुलही सवार सवारी समेत १५ जनासम्म जन्ती बोकेका सवारी चल्न पाउने भएका छन । यो अवधिमा सार्वजनिक सवारी साधन र नीजि सवारी साधन चल्न पाउने छैनन ।
लकडाउनमा खुल्ने सेवाहरु
बैठकले लकडाउनका अवसरमा खुल्न पाउने सेवाहरुको समेत सूचि निर्धारण गरेको छ । अत्यावश्यक सार्वजनिक सेवा (स्वास्थ्य, सुरक्षा, सञ्चार, विद्युत, खानेपानी), बैंक तथा वित्तिय संस्थाहरु र सरकारी कार्यालय सिमित कर्मचारीबाट सञ्चालन हुने छ ।
अत्यावश्यक बाहेकका नियमित सेवाहरु, स्वास्थ्य सुरक्षा बाहेकका सामाजिक संघसंस्थाका कार्य तथा सेवाहरु खुल्ने छैनन ।
यो अवधिमा औषधि तथा औषधि जन्य पसलहरु २४ सै घण्टा खुला रहनेछन । पेट्रोलपम्प, खाद्यान्न, फलफुल, तरकारी, दुध÷डेरी विहान ७ बजेदेखि १० बजेसम्म मात्र सञ्चालन गर्न पाईने छ ।
होटल तथा रेस्टुरेन्ट, व्युटिपार्लर, कपडा पसल, शैलुन, जिमखाना, सुनचाँदी पसल, टेलरिङ, फुटपाथ पसल, शैक्षिक संस्था, ट्युसन सेन्टर, पार्टी प्यालेस, स्टेशनरी लगाएतका नियमित सेवा र उद्योग कलकारखाना बन्द रहनेछन ।
