सिन्धुली । निर्माणाधिन कारागार कार्यालय र कार्यालयको फोहोरका कारण वस्ती नै प्रभावित भएको स्थानीयको गुनासो आएको सात महिनापछि अनुगमन भएको छ ।
निर्माण कम्पनीले कारागारको भवन, शौचालय र पर्खाल मापदण्ड विपरित बनाएको, कारागारको शौचालय भरिएर गाउँ नै दुर्गन्धित भएको भन्दै स्थानीयले २०७७ असोजदेखि नै जिल्ला प्रशासन कार्यालय सिन्धुली र कमलामाई नगरपालिकामा गुनासो सहित अनुरोध गर्दै आएका थिए ।
मंगलबार मात्र जिल्ला कारागार कार्यालय परिसरमा भएको निर्माणको अवस्थाको कमलामाई नगरपालिका प्रमुख खड्ग खत्री र प्रमुख जिल्ला अधिकारी सुरेश न्यौपानेले अनुगमन गरेका छन ।
अनुगमनका क्रममा जिल्ला कारागार निर्माणमा ठेकेदारले लापरवाही गरेको पाइएको प्रमुख जिल्ला अधिकारी सुरेश न्यौपानेले बताए । उनका अनुसार ८ करोड ८८ लाख रुपैयाँको लागतमा निर्माणाधिन कारागारको गुणस्तरहीन काम भएको पाइएपछि निर्माण गरिदै गरेको पर्खाल भत्काईएको छ ।
डाँफे–धुलीखेल संजीव एण्ड ब्रदर्श जेभिले निर्माण गरेको उक्त वालमा गुणस्तरहीन सामग्रीको प्रयोग गरीएको सिमेन्ट बालुवाको अनुपात नमिलाईएको पाईएको हो ।
निर्माण सामग्री तथा पुराना तारहरु सडकमै जथाभावी छाडिदिँदा स्थानीय दुर्घटनामा पर्ने गरेको समेत गुनासो आएपछि अनुगमन गरिएको र अनुगमनका क्रममा निर्माणमा गम्भीर लापरवाही गरिएको पाइएको प्रमुख जिल्ला अधिकारी सुरेश न्यौपानेले बताए । अनुगमनपछि ठेकेदार कम्पनीलाई तत्काल जिल्ला प्रशासन कार्यालयमा उपस्थित हुन निर्देशन गरिएको छ ।
कारागारबाट वाथरुम तथा किचनबाट निस्केको फोहोर पानी नजिकैको साँघोगैरा खोल्सीमा निकास गर्दा ऐसेलुजंघार र त्यस तलका बस्तीका बासिन्दालाई समस्या भएको छ । उक्त खोल्सीको पानी ऐसेलुजंघार, सानो करकरे, माझीडाँडा, पञ्चकन्या टोल, मजगाईं टोलका करीब चारसय घरधुरीका बासिन्दा गाई वस्तुलाई खुवाउने तथा नुहाउने, लुगाधुने काममा प्रयोग गर्दै आएका थिए ।
यस्तै कारागारबाट निस्केको शौचालयको पानी र दिशापिसाव सडक भरि छताछुल्ल भएपछि कनपा ५ को ऐसेलुजंघारको बस्ती नै समस्यामा परेको छ । उक्त फोहोरका कारण करीव ३० मिटर नजिकै रहेको सार्वजनिक इनारलाई समेत दुषित भएको स्थानीय गणेश बहादुर श्रेष्ठले बताए । उनका अनुसार सडकको मापदण्डलाई समेत वेवास्ता गरि सडक मिचेर वाल लगाईएको थियो ।
हाल निर्माण सम्पन्न भएको कारागार भवनको क्षमता ८० जना कैदी बन्दीको भए पनि हाल ५ सय ८ जना कैदीबन्दी राखिएको छ । २०७६ पुसबाट निर्माण थालिएको कारागार भवन २०७८ असार मसान्तभित्र सक्ने गरी ठेक्का सम्झौता भएको थियो ।
कृपया यो पनि पढ्नुहोला
