सिन्धुली । जिल्लामा मंगलबार एकै दिन ३६ जनामा कोरोना संक्रमण पुष्टि भएको छ । कोभिड १९ संक्रमणमा पर्नेहरुमा जनप्रतिनिधिहरु, राजनीतिक दलका नेताहरु, कर्मचारीहरु तथा सर्वसाधारण नागरिकहरु समेत परेका छन ।
दुधौलीमा एकै दिन २७ जना संक्रमित
दुधौली नगरपालिकामा मंगलबार २७ जनामा कोभिड १९ संक्रमण पुष्टि भएको छ । केहि दिन अघि संक्रमित भएका सेन्चुरी बैंकका कर्मचारी र संघिय सांसद गणेश कुमार पहाडीको सम्पर्क आएका २२ जनामा संक्रमण पुष्टि भएको छ भने क्वारेन्टाईनमा रहेका अन्य ५ जनामा पनि संक्रमण पुष्टि भएको स्वास्थ्य कार्यालय सिन्धुलीले जनाएको छ । 
संक्रमित हुनेमा नेकपाका केन्द्रीय सदस्य एवम् जिल्ला इन्चार्ज विषमलाल अधिकारी दनुवार, नेकपा बाग्मति प्रदेश सदस्य डम्बर बहादुर कार्की समेत २७ जना रहेका छन ।
यसरी कोभिड संक्रमण देखिनेमा ७ महिला र १९ जना पुरुष रहेका छन । दुधौली नगरपालिकामा कन्ट्याक ट्रेसिङमा धेरै जनामा संक्रमण देखिएपछि जिल्लामा आपतकालिन कार्ययोजना कार्यान्वयनमा जिल्ला विपद व्यवस्थापन समितिले समेत एक्सनमा जान सबै स्थानीय तहलाई अनुरोध गरेको छ ।
प्रमुख जिल्ला अधिकारी योगेन्द्र प्रसाद पाण्डेले जिल्लाको स्थिति भयावह तर्फ जाँदै गरेको र राजनीतिक दल, व्यवसायी, नागरिक कसैले पनि मापदण्ड पालना गर्न नखोजेकोमा चिन्ता व्यक्त गरेका छन ।
स्वास्थ्य कार्यालय सिन्धुलीका प्रमुख जितेन्द्र कुमार शाहले जिल्लामा कोभिड संक्रमण कलष्टर कलष्टरमा पुगेका कारण सचेतता बढाउनुपर्ने आवश्यकता रहेको बताए । उनले सिन्धुलीमा कोभिड १९ संक्रमण नियन्त्रण बाहिर जान सक्ने खतरा बढेको बताएका छन ।
सिन्धुली अस्पतालका अध्यक्ष प्रलाद पोखरेलले अस्पताल तथा एपोलो आइसोलेसनमा कोभिडका विरामीको उपचार गर्ने क्षमता समेत कम हुन थालेको र स्वास्थ्य संकट उत्पन्न भएको भन्दै चिन्ता व्यक्त गरेका छन । उनले कोभिडका गम्भिर विरामी आइरहेको र उनीहरुलाई भेन्टिलेर र आईसियु नहुदा उपचार गर्न नसकि रिफर गर्नु परेको बताए ।
गोलञ्जोरका अध्यक्ष नै संक्रमित
सिन्धुलीको गोलञ्जोर गाउँपालिकाका अध्यक्ष पुष्प बहादुर कार्कीमा कोरोना संक्रमण देखिएको छ । गाउँपालिकाका एक कर्मचारीमा कोभिड १९ पोजेटिभ देखिएपछि परिक्षण गराएका उनको रिपोर्ट पोजेटिभ आएको हो ।
मरिणका आठ जनामा कोरोना पुष्टि
मरिण गाउँपालिकाका ८ जनामा कोरोना संक्रमण पुष्टि भएको छ । कर्मचारी तथा जनप्रतिनिधिमा संक्रमण देखिएपछि गरिएको थप परिक्षणमा ८ जनामा संक्रमण देखिएको हो । गाउँपालिकामा संक्रमित हुनेमा जनप्रतिनिधि, कर्मचारी लगाएत रहेका छन ।
हालसम्म सिन्धुलीमा २ सय २७ जनामा कोरोना पोजेटिभ आएको छ । जसमध्ये १ सय ४३ जना आइसोलेसनमा रहेका छन । ती मध्ये ११५ जना होम आइसोलेसनमा रहेका छन । संक्रमित अधिकांश लक्षण सहितका रहेको र गम्भिर प्रकृतिका विरामी बढ्न थालेको जिल्ला प्रशासन कार्यालय सिन्धुलीका सूचना अधिकारी उपेन्द्र न्यौपानेले बताए ।
