सिन्धुली । कमलामाई नगरपालिकाले नगरपालिका भित्र खरका छाना हटाउन जस्तापाता अनुदान दिन सुरु गरेको छ । जसका कारण कमलामाई नगरपालिकाका १४ वटै वडामा यो आर्थिक वर्षमा घर परालका छाना हट्ने भएका छन ।
नगरपालिकाले वडा वडाबाट खरका छाना भएका घरहरुको तथ्यांक संकलन गरि जस्तापाता उपलब्ध गराउन थालेको हो । जसको वितरण वडा नंं ७, ९ र १२ बाट गरिएको छ । यी तिन वटा वडाका ६३ परिवारले जस्तापाता बुझिसकेका छन । नगरपालिकाले ९३ लाखमा जस्ता पाता खरिद गरिसकेको छ र २ सय ३७ परिवारलाई जस्तापाता वितरण गर्ने भएको हो ।
जस्तापाता बुझिसकेका नगरवासीले जस्ता पाएको १५ दिन भित्र आफ्नो घर जस्ताले छाईसक्नुपर्ने नगरपालिकाको सर्त रहेको योजना शाखा प्रमुख इन्जिनियर विनोदवाबु खकुरालले बताए ।
नगरपालिकाले खरका छाना भएका परिवारलाई बाँड्नका लागि ६ फिटको जस्तापाता ६ दशमलब ७५ बण्डल, ८ फिटको जस्ता १४० दशमलब २२ बन्डल, ९ फिटको जस्तापाता ३ सय ५५ बन्डल र १० फिटको जस्तापाता १ सय ६७ बण्डल खरिद गरेको छ । यस्तौ धुरी जस्तापाता ८ सय ८ वटा खरिद गरेको खकुरालले बताए ।
उनले छुट भएका कुनै घर पाईएमा उनीहरुलाई पनि जस्तापाता वितरण गरिने बताए । वडा वडाबाट सिफारिस आएकाले नछुटेको हुन सक्ने उनले बताए । नगरपालिकाभित्रका नागरिकलाई सुरक्षित आवासको प्रत्याभूति दिलाउन र आगलागी जस्ता समस्या कम गर्न यो अभियान चालिएको नगरपालिकाले जनाएको छ ।
कमलामाई नगरपालिकाका प्रमुख मेयर खड्ग खत्रीले यो आर्थिक वर्षमा खर परालका छाना नगरपालिकाबाट हट्ने बताएका छन ।
