सिन्धुली । केहि समय चलेर बन्द भएको सिन्धुली अस्पतालको शिशु सघन उपचार कक्ष आइतबार पुनः सञ्चालनमा ल्याइएको छ । हरेक महिना करिब एक सयको हाराहारीमा सुत्केरी हुने यो अस्पतालमा जन्मेका शिशुमा आउने स्वास्थ्य समस्यालाई समाधान गर्दै उपचार गर्नका लागि ४ वेडको सघन उपचार कक्ष सञ्चालनमा ल्याईएको हो ।
बाग्मति प्रदेश सभा सदस्य लेखनाथ दाहाल (राजन) ले उक्त कक्षको उद्घाटन गरेका छन । सिन्धुली अस्पतालमा २ जना बालरोग विशेषज्ञ आएपछि कोभिड तथा जनशक्ति अभावका कारणले बन्द भएको उक्त कक्ष पुनः सञ्चालनमा ल्याईएको हो ।
उक्त कक्षको उद्घाटन र अवलोकन गर्दै दाहालले सिन्धुली अस्पताललाई बाग्मति प्रदेशकै नमुना अस्पताल बनाउने उद्देश्यले अस्पताल टिम र जिल्लाका नेतृत्व लागि परेको बताए । उनले उक्त उद्देश्य पुरा गर्न र अस्पताललाई अब्बल बनाउन अस्पताल विकास समिति र स्वास्थ्यकर्मीको उल्लेख्य योगदान रहनु पर्नेमा जोड दिए ।
दाहालले दक्ष चिकित्सक, स्वास्थ्यकर्मीहरुले समय, सिप र सृजनाको उच्चतम प्रयोग गरि सेवा प्रवाह गरेमा सिन्धुली अस्पताल नमुना बन्ने विश्वास व्यक्त गरे ।
उनले भने, ‘साधन, स्रोत र पछिल्लो प्रविधि उपलब्धतालाई दक्ष जनशक्तिले प्रयोग गर्नुस, सेवा प्रवाह गर्नुस, अस्पताल नमुना बन्ने छ । सघन शिशु उपचार कक्ष सञ्चालनमा आएपछि शिशुको उपचारका लागि बाहिर जान नपर्नेमा पनि उनले विश्वास व्यक्त गरे ।
सिन्धुली अस्पतालका डा. अभय चन्द्र यादवले जनशक्तिको अभाव र कोभिड १९ का कारण बन्द रहेको उपचार कक्ष सञ्चालनले जिल्ला बाहिर रिफर गर्नुपर्ने शिशुलाई जिल्लामै उपचार गर्न सकिने अवस्था सृजना भएको बताए । उनले अस्पतालले केहि दिनमै प्रेयाडिक भेन्टिलेटर पनि ल्याउने तयारी भएकाले शिशुहरुको उपचारका लागि काठमान्डौ रिफर गर्नुपर्ने अवस्था अन्त्य हुने विश्वास व्यक्त गरे ।
डा.यादवले भने, ‘काठमान्डौ पठाउनु पर्ने बाध्यता भएका शिशुलाई चार घण्टाको समय व्यवस्थापन गर्न नसकेर मृत्यु वरण गर्नुपर्ने अवस्थालाई रोक्न कक्ष सञ्चालनले सहजता ल्याउने छ ।’ उनले थपे, ‘यसले कम तौल भएका, संकट ग्रस्त, स्वास प्रस्वासको समस्या भएका, समय नपुगि जन्मेका र स्वास्थ्यमा जटिल समस्या आएका शिशुको उपचारका लागि सहजता ल्याउने छ ।’
उक्त अस्पतालमा जोखिमपूर्ण अवस्थाका मासिक करिब ६ वटा केश आउने गरेका छन । जसका लागि सघन शिशु उपचार कक्षको आवश्यकता पर्दछ । आर्थिक वर्ष २०७६÷७७ मा त्यस्ता ६५ वटा केश आएको प्रसुति सेवाकी नर्स रामेश्वरी कायमलीले बताईन । उनका अनुसार उक्त अस्पतालमा एक वर्षको अवधिमा ९ सय ३१ जना महिला सुत्केरी भएकोमा १ सय ७१ जना महिलाले अप्रेशन सहितको सुत्केरी सेवा पाएका छन । यस्तै सिन्धुली अस्पतालमा चालु आर्थिक वर्षको २ महिनामा एक सय ९३ जना महिलाले बच्चा जन्माएका छन । जसमा १५ जना शिशुमा स्वास्थ्य समस्या देखिएको छ ।
यस्तै कोभिडको अवधिमा उक्त अस्पतालमा किड्नीमा समस्या देखिएका १२ जना शिशुको सफल उपचार समेत गरिएको अस्पतालले जनाएको छ ।
